ഡോ.വി.ആര്.പ്രബോധചന്ദ്രന്നായര്
മഹാതന്ത്രാ മഹാമന്ത്രാ മഹായന്ത്രാ മഹാസനാ
മഹായാഗക്രമാരാധ്യാ മഹാഭൈരവപൂജിതാ
ദേവിയെ സംബന്ധിച്ച തന്ത്രങ്ങളും മന്ത്രങ്ങളും യന്ത്രങ്ങളും ദേവി സ്വീകരിച്ചിട്ടുള്ള ആസനവും (ഇരിപ്പിടം/വാഹനം) എല്ലാം അനന്യലഭ്യമാഹാത്മ്യമാര്ന്നവയത്രേ. ശ്രീ പരമേശ്വരന് സ്വയം നിയമനം ചെയ്ത ചതുഷഷ്ടി (അറുപത്തിനാലു) തന്ത്രങ്ങളെക്കാള് മാഹാത്മ്യമുള്ളവയാണ് ദേവിയുടെ പ്രേരണകൊണ്ട് അദ്ദേഹംതന്നെ കല്പിച്ച ചന്ദ്രകലാഷ്ടകം എന്നു പേരുള്ള പുരുഷാര്ഥപ്രദങ്ങളായ ശ്രീവിദ്യാതന്ത്രങ്ങള് എട്ടെണ്ണം. ഏറ്റവും ശ്രേഷ്ഠമായ ശ്രീവിദ്യാമന്ത്രംതന്നെ സ്വരൂപമായവളാണ് ലളിതാംബിക. ശ്രീചക്രം മുതലായ ശ്രേഷ്ഠയന്ത്രങ്ങളും ദേവീസ്വരൂപംതന്നെ. ഭക്തോത്തംസങ്ങളുടെ ഹൃദയവും അഖിലാണ്ഡമണ്ഡലചക്രവര്ത്തിനീയോഗ്യമായ സിംഹാസനവും മൃഗരാജാവായ സിംഹവുമാണല്ലോ ദേവിയുടെ ഇരിപ്പിടം.
ശ്രീ ലളിതാപരമേശ്വരീ സമാരാധനയ്ക്ക് സാധാരണയാഗങ്ങള് മതിയാവുകയില്ല. പൂജാക്രമം ബാഹ്യമോ ആന്തരമോ ആകട്ടെ, ഒരുക്കങ്ങള് വന്തോതിലുള്ളവയും ചിട്ടകള് അതിസൂക്ഷ്മവുമായിരുന്നേ തീരൂ. ഭൈരവന് ശ്രീപരമേശ്വരന് മഹേശ്വരന്പോലും ദേവിയെ ആരാധിക്കുന്നു.
Discussion about this post