ബാംഗളൂര്: ഭാരതത്തിന്റെ യശസുയര്ത്തി മംഗള്യാന് ചൊവ്വയുടെ ഭ്രമണപഥത്തില്. ആദ്യ ഗ്രഹാന്തര ദൗത്യം തന്നെ ലക്ഷ്യം കണ്ട ആദ്യരാജ്യമെന്ന പദവിയിലേയ്ക്ക് ഇന്ത്യയെ ഉയര്ത്തി മംഗള്യാന് ഐതിഹാസിക വിജയമായി. എല്ലാം ഇന്ത്യയുടെ ശസ്ത്രജ്ഞര് കണക്കുകൂട്ടിയതുപോലെ നടന്നു. ഇന്ത്യയുടെ ചൊവ്വാ പര്യവേഷണ പേടകം മംഗള്യാന് ചൊവ്വയുടെ ഭ്രമണപഥത്തിലെത്തി. ചൊവ്വയിലേക്കുള്ള കന്നിദൗത്യംതന്നെ വിജയമാക്കുന്ന ആദ്യത്തെ ബഹിരാകാശ ഏജന്സിയായി ഇതോടെ ഇന്ത്യന് ബഹിരാകാശ ഗവേഷണ സംഘടന മാറി. ഭാരതീയര്ക്കു അഭിമാനം പകരുന്ന ആ മുഹൂര്ത്തത്തിനു സാക്ഷ്യംവഹിക്കാന് പ്രധാനമന്ത്രി നരേന്ദ്രമോഡി ബാംഗളൂരിലെ ഇസ്രോ ആസ്ഥാനത്ത് എത്തിയിരുന്നു.
ബുധനാഴ്ച പുലര്ച്ചെ 4:17:32 നു മംഗള്യാനുമായുള്ള വാര്ത്താവിനിമയത്തിനു മീഡിയം ഗെയിന് ആന്റിന ഉപയോഗിച്ചതോടെയാണ് നിര്ണായകമായ പ്രവര്ത്തനങ്ങള് ആരംഭിച്ചത്. അടുത്ത നടപടി രാവിലെ 6:56:32 ന് നടന്നു. നിശ്ചിത സമയത്തിന് 21 മിനിറ്റ് മുമ്പ്. ഈ സമയത്ത് മംഗള്യാനിലെ മൊമന്റം വീല് പ്രവര്ത്തിപ്പിച്ച് പേടകത്തിന്റെ ദിശ തിരിച്ചു. എന്ജിന് പ്രവര്ത്തിക്കേണ്ടതിന് അഞ്ചു മിനിറ്റും 13 സെക്കന്ഡും ഉള്ളപ്പോള് ഗ്രഹണം തുടങ്ങി. 7:14:32 ന് പേടകത്തിലെ ചെറുമോട്ടോറുകള് (ത്രസ്റ്ററുകള്) പ്രവര്ത്തിപ്പിച്ച് പേടകത്തിന്റെ ദിശ നിര്ദിഷ്ട ലക്ഷ്യത്തിലേക്ക് ആക്കി. 7:17:32 ന് ദ്രവഇന്ധന എന്ജിന് അഥവാ ലാം പ്രവര്ത്തനം ആരംഭിച്ചു. എന്ജിന് ജ്വലനം തുടങ്ങി 4.3 മിനിറ്റ് കഴിഞ്ഞപ്പോള് ചൊവ്വ കാഴ്ചയില്നിന്നു മറയുന്ന മാഴ്സ് ഒക്കള്ട്ട് തുടങ്ങി. ഇതൊരു അനിശ്ചിതത്വത്തിന്റെ നിമിഷമായിരുന്നു. 7:21:50 ന് ആരംഭിച്ച ഈ പ്രതിഭാസം 7:45:10 ന് അവസാനിച്ചു.
ചൊവ്വ മറഞ്ഞു നിമിഷങ്ങള്ക്കകം (7:22:32 ന്) പേടകവുമായുള്ള വാര്ത്താവിനിമയം മുറിഞ്ഞു. എന്നാല് 7:30:02 ന് എന്ജിനില് ജ്വലനം തുടങ്ങിയെന്ന വിവരം കിട്ടി. ഇതോടെ ശാസ്ത്രസമൂഹത്തിന് ആശ്വാസമായി. 7:42:46 മുതല് 8:04:32 വരെ മംഗള്യാനെ വീണ്ടും തിരിക്കുന്ന പ്രവര്ത്തനങ്ങള് നടന്നു. മിനിറ്റുകള്ക്കുമുമ്പ് നഷ്ടമായ വാര്ത്താവിനിമയം7:47:46 നു പുനരാരംഭിച്ചു. ഇതോടെയാണ് എന്ജിന് പ്രവര്ത്തനം കൃത്യമായിരുന്നോ, നിര്ദിഷ്ട ഭ്രമണപഥത്തിലായോ എന്നുള്ള വിവരങ്ങള് ശാസ്ത്രസമൂഹത്തിന് ലഭിച്ചത്. കാന്ബറയിലെ കേന്ദ്രത്തിലാണ് പേടകത്തില് നിന്നുള്ള സിഗ്നലുകള് ആദ്യം ലഭിച്ചത്. അവര് നിമിഷങ്ങള്ക്കകം ഐഎസ്ആര്ഒയ്ക്ക് വിവരം കൈമാറി. പിന്നീട് ആഹ്ലാദത്തിന്റെ വേലിയേറ്റമാണ് ഉണ്ടായത്.
നിലയത്തില് ഉണ്ടായിരുന്ന പ്രധാനമന്ത്രി മോഡി ഇസ്രോ ചെയര്മാന് ഡോ.കെ.രാധാകൃഷ്ണന് അടക്കമുള്ള ശാസ്ത്രജ്ഞരെ അഭിനന്ദിച്ചു. ചൊവ്വയോട് 423 കിലോമീറ്റര്വരെ അടുത്തും 80000 കിലോമീറ്റര് വരെ അകന്നുമുള്ള ഒരു ദീര്ഘവൃത്തപഥത്തിലാണ് മംഗള്യാന് ഇപ്പോഴുള്ളത്. ഈ ഭ്രമണപഥത്തിലൂടെ മംഗള്യാന് ഭൂമിയിലെ 75.8 മണിക്കൂര്കൊണ്ട് ചൊവ്വയെ ഒരുവട്ടം ചുറ്റും.
Discussion about this post