തിരൂര്‍ (മലപ്പുറം): മാമാങ്ക സ്മാരക സംരക്ഷണവുമായി ബന്ധപ്പെട്ട് തിരുനാവായ കൊടക്കല്‍ ടൈല്‍ ഫാക്ടറി വളപ്പില്‍ സംസ്ഥാന പുരാവസ്തുവകുപ്പ് ഉദ്ഖനനം നടത്തവേ കണ്ടെത്തിയ ശിവലിംഗവും ക്ഷേത്രാവശിഷ്ടങ്ങളും കുഴിച്ചുമൂടിയ സംഭവത്തെക്കുറിച്ച് ആര്‍ക്കിയോളജിക്കല്‍ സര്‍വേ ഓഫ് ഇന്ത്യ അന്വേഷണം ആരംഭിച്ചു. പ്രധാനമന്ത്രി നരേന്ദ്ര മോഡിയുടെ നിര്‍ദേശപ്രകാരമാണ് അന്വേഷണം. ആര്‍ക്കിയോളജിക്കല്‍ സര്‍വേ ഓഫ് ഇന്ത്യ സൂപ്രണ്ട് സി. കുമാരനാണ് അന്വേഷണച്ചുമതല. ഇന്നലെ രാവിലെ അദ്ദേഹം മാമാങ്കസ്മാരകങ്ങള്‍ സന്ദര്‍ശിച്ചു. ക്ഷേത്രാവശിഷ്ടങ്ങള്‍ കുഴിച്ചുമൂടിയ മരുന്നറ, ചങ്ങമ്പള്ളി കളരി, പുഴക്കാമണ്ഡപം, കൂരിയാല്‍ എന്നിവിടങ്ങള്‍ പരിശോധന നടത്തി. രണ്ടാഴ്ചയ്ക്കുള്ളില്‍ കേന്ദ്രസര്‍ക്കാരിനു റിപ്പോര്‍ട്ട് സമര്‍പ്പിക്കുമെന്ന് അദ്ദേഹം വ്യക്തമാക്കി. കൊടക്കല്‍ ഓട്ടുകമ്പനി നിലനിന്നിരുന്ന 3.7251 ഹെക്ടര്‍ സ്ഥലം പുരാതന തളി ശിവക്ഷേത്രഭൂമിയാണെന്ന സര്‍ക്കാര്‍രേഖ തിരൂര്‍ ദിനേശ് അന്വേഷണോദ്യോഗസ്ഥനു കൈമാറി. സംസ്ഥാന പുരാവസ്തു വകുപ്പ് ഉദ്യോഗസ്ഥര്‍ മലപ്പുറം ജില്ലാ കലക്ടറുടെ നിര്‍ദേശപ്രകാരം 2003 സെപ്റ്റംബര്‍ 13, 14 തീയതികളിലാണ് ഉദ്ഖനനം നടത്തിയത്.
ഓറല്‍ ഹിസ്റ്ററി റിസര്‍ച്ച് ഫൗണ്ടേഷന്‍ ഡയറക്ടര്‍ തിരൂര്‍ ദിനേശ് ഇതു സംബന്ധിച്ചു പ്രധാനമന്ത്രിക്കു നിവേദനം നല്‍കിയിരുന്നു. ക്ഷേത്രാവശിഷ്ടങ്ങളും പീഠവും ശിവലിംഗവും കണ്ടെത്തിയ വിവരവും മണ്ണിട്ടുമൂടിയതും സര്‍ക്കാരിനു സമര്‍പ്പിച്ച റിപ്പോട്ടില്‍ വ്യക്തമാക്കിയിരുന്നു. സര്‍ക്കാര്‍ ഈ റിപ്പോര്‍ട്ട് അവഗണിച്ചു. മാമാങ്കസ്മാരകങ്ങള്‍ സംരക്ഷിക്കാന്‍ നിയോഗിക്കപെട്ടവര്‍തന്നെ അവ കുഴിച്ചുമൂടിയ സാഹചര്യത്തില്‍ അന്വേഷണം വേണമെന്നും ക്ഷേത്രവും ഭൂഗര്‍ഭപാതയും പുനഃസ്ഥാപിച്ച്, ടൈല്‍ ഫാക്ടറിയുടെ മുഴുവന്‍ ഭൂമിയും സാംസ്‌ക്കാരിക പൈതൃകകേന്ദ്രമാക്കണമെന്നും നിവേദനത്തില്‍ ആവശ്യപ്പെട്ടിരുന്നു.
Discussion about this post