തിരുവനന്തപുരം: കേരളത്തില്‍ മൂന്നു ദിവസം കൂടി കനത്ത മഴയ്ക്കു സാധ്യതയെന്ന് കാലാവസ്ഥാ നിരീക്ഷണ കേന്ദ്രം. വടക്കന്‍ കേരളത്തില്‍ കുറച്ചു ദിവസങ്ങളായി പെയ്തിരുന്ന മഴ ശനിയാഴ്ച തെക്കന്‍ കേരളത്തിലും ശക്തമായി. തിരുവനന്തപുരം, കൊല്ലം ജില്ലകളിലും മഴ ശക്തമായിരുന്നു. സംസ്ഥാനത്തു തെക്കുപടിഞ്ഞാറന്‍ കാലവര്‍ഷം ശക്തമായതായി കാലാവസ്ഥാ നിരീക്ഷണ കേന്ദ്രം അറിയിച്ചു.
കഴിഞ്ഞ 48 മണിക്കൂറിനുള്ളില്‍ കേരളത്തില്‍ വ്യാപകമായി കനത്ത മഴ പെയ്തു. വയനാട്, ഇടുക്കി, കണ്ണൂര്‍, തൃശൂര്‍, മലപ്പുറം ജില്ലകളിലാണ് മഴ ഏറ്റഴും ശക്തമായത്. വയനാട് കല്‍പ്പറ്റയില്‍ വെള്ളപ്പൊക്ക ഭീഷണിയെതുടര്‍ന്ന് 300 കുടുംബങ്ങളെ മാറ്റിപ്പാര്‍പ്പിച്ചിരിക്കുകയാണ്. ന്യൂനമര്‍ദപാത്തി ഗുജറാത്തില്‍ നിന്നും കേരള തീരത്തേക്ക് അടുത്തതാണ് ഇപ്പോള്‍ മഴ ശക്തമായതിനു കാരണം. ബംഗ്ലാദേശില്‍ നിന്നും ന്യൂനമര്‍ദമേഖല പശ്ചിമബംഗാള്‍ തീരത്തേക്കു മാറിയതും കേരളത്തില്‍ മഴ ശക്തമാകുന്നതിനു കാരണമായിട്ടുണ്ട്. കേരളത്തിലെ ചില ജില്ലകളില്‍ മഴയ്‌ക്കൊപ്പമുള്ള കാറ്റിന്റെ ശക്തിയും വര്‍ധിച്ചിട്ടുണ്ട്.
Discussion about this post