തിരുവനന്തപുരം/കൊച്ചി: കര്ക്കിടവാവ് ബലിയിടല് ചടങ്ങിന്റെ ഭാഗമായി പിതൃക്കളുടെ ആത്മശാന്തിക്കായി ബലിയിടാന് പുണ്യതീര്ഥങ്ങളിലേക്ക് ആയിരക്കണക്കിനു ഭക്തരാണ് ഒഴുകിയെത്തിയത്. ദേവസ്വം ബോര്ഡും വിവിധ ഹിന്ദുസംഘടനകളും ബലിതര്പ്പണത്തിനുള്ള സൗകര്യങ്ങള് ഒരുക്കി. തിരുവനന്തപുരത്തു തിരുവല്ലം പരശുരാമക്ഷേത്രം, ശംഖുമുഖം, വര്ക്കല പാപനാശം കടപ്പുറം എന്നിവിടങ്ങളില് അതിരാവിലെ മുതല് തന്നെ വന്തിരക്കാണ് അനുഭവപ്പെട്ടത്. പുലര്ച്ചെ മൂന്നു മുതല് ബലിതര്പ്പണ ചടങ്ങിനായി ഭക്തര് എത്തിത്തുടങ്ങി. ശംഖുമുഖത്തു 100 പരികര്മ്മികളെയാണു ചടങ്ങുകള്ക്കു നിയോഗിച്ചിരുന്നത്.
ആലുവാ മണപ്പുറത്തും ഭക്തരുടെ വന്തിരക്കാണ് അനുഭവപ്പെട്ടത്. ഇവിടെ 80ലധികം ബലിത്തറകളും 320 പരികര്മ്മികളുടെയും സൗകര്യം ഒരുക്കിയിരുന്നു. ആലുവ മണല്പ്പുറത്തും ആലുവ അദ്വൈതാശ്രമത്തിലും തര്പ്പണത്തിനുള്ള സൗകര്യങ്ങള് ഏര്പ്പെടുത്തിയിരുന്നു.
കൊല്ലത്ത് തിരുമുല്ലവാരം ഉള്പ്പെടെയുള്ള സ്ഥലങ്ങളില് വ്യാഴാഴ്ച വൈകുന്നേരം 6.42 മുതല് ബലിതര്പ്പണ ചടങ്ങുകള് തുടങ്ങിയിരുന്നു. തിരുമുല്ലാവാരം കടപ്പുറത്തും ക്ഷേത്രപരിസരത്തും വാവുബലിക്കു വന്നവരെ കൊണ്ടുനിറഞ്ഞു. ഒരേസമയം 500 പേര്ക്കു ബലിതര്പ്പണം നടത്തുന്നതിനു വിശാലമായ പന്തലാണ് ഒരുക്കിയിട്ടുള്ളത്.
Discussion about this post