തെരഞ്ഞെടുപ്പ് പ്രചാരണം: ശബ്ദമലിനീകരണമുണ്ടാക്കിയാല്‍ നടപടി

തിരുവനന്തപുരം: തദ്ദേശസ്ഥാപനങ്ങളിലേക്കുള്ള തെരഞ്ഞെടുപ്പുപ്രചാരണവുമായി ബന്ധപ്പെട്ട് ശബ്ദമലിനീകരണമുണ്ടാക്കുന്നവിധം ഉച്ചഭാഷിണി ഉപയോഗിച്ചാല്‍ കര്‍ശന നടപടിയെടുക്കുമെന്ന് ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കളക്ടര്‍ ബിജു പ്രഭാകര്‍ അറിയിച്ചു.

നിയമലംഘനം ശ്രദ്ധയില്‍പ്പെട്ടാല്‍ മൈക്ക് ഓപ്പറേറ്ററുടെ ലൈസന്‍സ് റദ്ദാക്കി ഉപകരണങ്ങള്‍ പിടിച്ചെടുക്കും. തെരഞ്ഞെടുപ്പ് യോഗങ്ങള്‍ നടക്കുന്ന സ്ഥലങ്ങളില്‍ നിശ്ചയിക്കപ്പെട്ട സമയത്തിന് രണ്ടുമണിക്കൂര്‍ മുമ്പ് മാത്രമേ ഉച്ചഭാഷിണി പ്രവര്‍ത്തിപ്പിക്കാവൂ. യോഗം കഴിഞ്ഞാലുടന്‍ ഓഫാക്കുകയും വേണം. ഉച്ചഭാഷിണികള്‍, മൈക്ക് സെറ്റ് തുടങ്ങിയ ഉപയോഗിക്കുമ്പോള്‍ വ്യവസായമേഖലയില്‍ 75നും 70നും ഇടയിലും, വാണിജ്യമേഖലയില്‍ 55നും 45നും ഇടയിലും, ആശുപത്രി, വിദ്യാലയങ്ങള്‍ എന്നിവയുടെ 100 മീറ്റര്‍ പരിധിയ്ക്കുള്ളിലെ നിശബ്ദ മേഖലയില്‍ 50നും 40നും ഇടയിലും ആവൃത്തിയില്‍ മാത്രമേ പ്രവര്‍ത്തിപ്പിക്കാവൂ. രാവിലെ ആറുമുതല്‍ രാത്രി 10 വരെ മാത്രമേ ഉച്ചഭാഷിണികള്‍/മൈക്രോഫോണ്‍/മറ്റ് വാദ്യോപകരണങ്ങള്‍ എന്നിവ പ്രവര്‍ത്തിപ്പിക്കാവൂ. ആശുപത്രികള്‍/വിദ്യാലയങ്ങള്‍ തുടങ്ങിയവയുടെ 100 മീറ്റര്‍ പരിധിക്കുള്ളിലെ നിശബ്ദമേഖലയില്‍ സൗണ്ട് ആംപ്ലിഫയര്‍ ഉപയോഗിച്ച് 50 ഡെസിബെലിന് മുകളില്‍ ശബ്ദം പുറപ്പെടുവിക്കുന്നത് കര്‍ശനമായി നിരോധിച്ചിട്ടുണ്ട്. ജില്ലയില്‍ ഉടനീളം ഡ്രം, ഹോണ്‍ മുതലായ ഉയര്‍ന്ന ശബ്ദനിലവാരമുള്ള ഉപകരണങ്ങളാല്‍ തീവ്രശബ്ദം പുറപ്പെടുവിക്കാന്‍ പാടില്ല. ബോക്‌സ് ടൈപ്പ് ശബ്ദ ഉപകരണങ്ങള്‍ മാത്രമേ ഉപയോഗിക്കാവൂ.

പൊതുജനങ്ങള്‍ക്ക് ശബ്ദമലിനീകരണം സംബന്ധിച്ച് പരാതികള്‍ ഉണ്ടെങ്കില്‍ കളക്ടറേറ്റിലെ കണ്‍ട്രോള്‍ റൂം നമ്പരുകളായ 0471 2730045, 9497711281 എന്നിവയില്‍ അറിയിക്കാം. സുപ്രീംകോടതിയുടെ 30.08.2000ലെ വിധിയും കേരള ഹൈക്കോടതിയുടെ 21.01.2013 ലെ വിധിയും മാനിച്ച് ജില്ലയില്‍ 2014 നവംബര്‍ മുതല്‍ ശബ്ദ മലിനീകരണ നിയന്ത്രണത്തിന് പൊതു മാനദണ്ഡങ്ങള്‍ പുറപ്പെടുവിച്ചിരുന്നു. ഇതുപ്രകാരം ശബ്ദമലിനീകരണ നിയന്ത്രണത്തിന് നടപടികള്‍ ജില്ലയില്‍ ശക്തമായി തുടര്‍ന്നുവരുന്നതിന്റെ ഭാഗമായാണ് നടപടി.