ആലപ്പുഴ: തദ്ദേശസ്വയംഭരണ സ്ഥാപനങ്ങളിലേയ്ക്കുള്ള തെരഞ്ഞെടുപ്പില്‍ ബിജെപി ഇതുവരെയില്ലാത്ത തരത്തില്‍ നേട്ടമുണ്ടാക്കുമെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. ആലപ്പുഴയില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.
മുഴുവന്‍ ഹിന്ദു സംഘടനകളും എസ്എന്‍ഡിപി-ബിജെപി സഖ്യത്തിനു പിന്നിലുണ്ട്. എസ്എന്‍ഡിപി പാര്‍ട്ടി രൂപീകരിച്ച ശേഷം ബിജെപിയുമായി സഖ്യമുണ്ടാക്കിയിരുന്നെങ്കില്‍ വലിയ വിജയമാകുമായിരുന്നുവെന്നും അക്കാര്യത്തില്‍ ജാഗ്രതകുറവ് സംഭവിച്ചുവെന്നും അദ്ദേഹം പറഞ്ഞു.
എസ്എന്‍ഡിപിയെയും ബിജെപിയെയും തമ്മിലടിപ്പിക്കാന്‍ നോക്കേണ്ട. തെരഞ്ഞെടുപ്പ് ഫലം വരുമ്പോള്‍ എസ്എന്‍ഡിപി-ബിജെപി സഖ്യത്തിനു നിരവധി പഞ്ചായത്ത് ഭരണം ലഭിക്കുമെന്നും വെള്ളാപ്പള്ളി നടേശന്‍ പറഞ്ഞു.
