തിരുവനന്തപുരം: ശബരിമല ക്ഷേത്രദര്ശനത്തിനെത്തുന്ന തീര്ത്ഥാടകര് പമ്പാനദിയെ മലിനമാക്കുന്ന പ്രവൃത്തികളിലേര്പ്പെടരുതെന്ന് സര്ക്കാര്. തീര്ത്ഥാടകരില് വലിയൊരു വിഭാഗം തിര്ത്ഥാടനവേളയില് അവര് ഉപയോഗിച്ച വസ്ത്രവും ജൈവ, അജൈവമാലിന്യങ്ങളും മറ്റു വസ്തുക്കളും പമ്പാനദിയില് ഉപേക്ഷിക്കുന്നത് ജലം മലിനമാകുന്നതിന് പ്രധാന കാരണങ്ങളിലൊന്നാണെന്ന് കണ്ടെത്തിയിട്ടുണ്ട്.
തീര്ത്ഥാടനവുമായി ബന്ധപ്പെട്ട് മതപരമോ ആചാരപരമോ വിശ്വാസപരമോ ആയ ഏതെങ്കിലും കാര്യങ്ങളുടെ അടിസ്ഥാനമില്ലാതെയാണ് തീര്ത്ഥാടകര് ഇപ്രകാരം ചെയ്യുന്നത്. തീര്ത്ഥാടക സംഘങ്ങളെ നയിക്കുന്നവരുടെ പ്രേരണമൂലമാണ് ഭക്തരില് പലരും ഇത് ചെയ്യുന്നതെന്നും ശ്രദ്ധയില്പ്പെട്ടിട്ടുണ്ട്. വസ്ത്രങ്ങള്, ജൈവ, അജൈവ മാലിന്യങ്ങള്, മറ്റ് വസ്തുക്കള് എന്നിവ വലിച്ചെറിഞ്ഞ് പമ്പാനദി മലിനമാക്കുന്നത് ജലനിയമം, ഇന്ത്യന് ശിക്ഷാനിയമം എന്നിവ പ്രകാരം ശിക്ഷാര്ഹമാണ്. ഇതിന് പ്രേരണ നല്കുന്നതും ശിക്ഷാര്ഹമായ കുറ്റമാണ്. ഇങ്ങനെയുള്ളവര്ക്കെതിരേ കര്ശന നിയമനടപടി സ്വീകരിക്കണമെന്ന് ഹൈക്കോടതി ഉത്തരവിട്ടിരിക്കുകയാണ്. അതിനാല് പമ്പാനദിയിലേക്ക് വസ്ത്രങ്ങളുള്പ്പെടെയുള്ള വസ്തുക്കള് ഉപേക്ഷിക്കരുതെന്നും നദീസുരക്ഷയും സംരക്ഷണവുമുറപ്പു വരുത്താന് തീര്ത്ഥാടകര് സഹകരിക്കണമെന്നും സര്ക്കാര് ആവശ്യപ്പെട്ടു
Discussion about this post