കൊച്ചി: കതിരൂര്‍ മനോജ് വധക്കേസില്‍ സിപിഎം കണ്ണൂര്‍ ജില്ലാ സെക്രട്ടറി പി.ജയരാജനു മുന്‍കൂര്‍ ജാമ്യം നല്‍കുന്നതിനെ ശക്തമായി എതിര്‍ത്ത് സിബിഐ ഹൈക്കോടതിയില്‍. മനോജ് വധക്കേസിലെ മുഖ്യ സൂത്രധാരനാണ് ജയരാജനെന്നും അതിനാല്‍ ജാമ്യം നല്‍കരുതെന്നുമാണ് സിബിഐയുടെ വാദം.
ഗൂഢാലോചനയില്‍ മുഖ്യപങ്കും ആസുത്രണത്തിന്റെ കേന്ദ്രവും ജയരാജനാണ്. പല മൃഗീയ കുറ്റകൃത്യങ്ങളിലും ജയരാജനു പങ്കുണ്ട്. മുന്‍കൂര്‍ ജാമ്യം നല്‍കിയാല്‍ കേസ് അന്വേഷണത്തെ ബാധിക്കും. ജയരാജനെ വിശദമായി ചോദ്യം ചെയ്യേണ്ടതുണ്‌ടെന്നും കൂടുതല്‍ തെളിവുകള്‍ ശേഖരിച്ചുവരികയാണെന്നും സിബിഐ ഹൈക്കോടതിയെ അറിയിച്ചു.
എന്നാല്‍ കേസ് രാഷ്ട്രീയ പ്രേരിതമാണെന്നും ചോദ്യം ചെയ്യുന്നതിനു അറസ്റ്റ് ചെയ്യേണ്ട ആവശ്യമില്ലെന്നുമാണ് ജയരാജന്റെ വാദം. കേസില്‍ താന്‍ ഒരു തവണ വിശദമായ ചോദ്യം ചെയ്യലിനു ഹാജരായതാണ്. പിന്നീട് തലശേരി സെഷന്‍സ് കോടതിയില്‍ ജാമ്യഹര്‍ജി നല്‍കിയപ്പോള്‍ താന്‍ പ്രതിയല്ലെന്നും സിബിഐ പറഞ്ഞിരുന്നു. പിന്നീട് തന്നെ പ്രതിപ്പട്ടികയില്‍ ചേര്‍ത്തത് ഗൂഢാലോചനയുടെ ഭാഗമാണെന്നാണ് ജയരാജന്റെ വാദം.
കഴിഞ്ഞ ദിവസം പരിഗണിക്കേണ്ട ജാമ്യഹര്‍ജി ജയരാജന്റെ അഭിഭാഷകന്റെ അഭ്യര്‍ഥന പ്രകാരമാണ് ഇന്നത്തേയ്ക്ക് മാറ്റിയത്. ഹര്‍ജി അനന്തമായി നീട്ടികൊണ്ടുപോകാന്‍ കഴിയില്ലെന്നും കോടതി നിരീക്ഷിച്ചിരുന്നു.
തലശേരി സെഷന്‍സ് കോടതി മൂന്ന് തവണ ജയരാജന്റെ മുന്‍കൂര്‍ ജാമ്യഹര്‍ജി തള്ളിയിരുന്നു. ഹൈക്കോടതി കൂടി മുന്‍കൂര്‍ ജാമ്യാപേക്ഷ തള്ളിയാല്‍ ജയരാജനെ സിബിഐ അറസ്റ്റു ചെയ്‌തേക്കും. തലശേരി കോടതി ജാമ്യഹര്‍ജി തള്ളിയതോടെ ജയരാജന്‍ പരിയാരം മെഡിക്കല്‍ കോളജ് ആശുപത്രിയില്‍ ചികിത്സ തേടിയിരിക്കുകയാണ്.
Discussion about this post