പെരുമ്പാവൂര്‍: ജിഷയുടെ കൊലപാതകവുമായി ബന്ധപ്പെട്ട് സഹോദരി ദീപയെ പോലീസ് ചോദ്യം ചെയ്തു. പെരുമ്പാവൂര്‍ താലൂക്ക് ആശുപത്രിയില്‍ ചികിത്സയില്‍ കഴിയുന്ന അമ്മയ്‌ക്കൊപ്പമുള്ള ദീപയെ കുറുപ്പംപടി പോലീസ് സ്‌റ്റേഷനിലെത്തിച്ചെങ്കിലും ദീപ സഹകരിക്കാന്‍ വിസമ്മതിച്ചതിനെത്തുടര്‍ന്ന് തിരിച്ച് ആശുപത്രിയില്‍ എത്തിച്ച് അമ്മയുടെ സാന്നിധ്യത്തിലാണ് ചോദ്യം ചെയ്തത്.
നിലവിലുള്ള അന്വേഷണം വഴിമുട്ടിയ സാഹചര്യത്തിലാണ് കുടുംബാംഗങ്ങളെയും സുഹൃത്തുക്കളെയും കേന്ദ്രീകരിച്ച് അന്വേഷണം നടത്തുന്നത്. ഇതിന്റെ ഭാഗമായാണ് ദീപയെ ചോദ്യം ചെയ്തത്. പെരുമ്പാവൂര്‍ ഡിവൈഎസ്പി ജിജിമോന്റെ നേതൃത്വത്തിലായിരുന്നു ചോദ്യം ചെയ്യല്‍. ജിഷയുടെ കൊലപാതകം നടന്ന ശേഷം അമ്മയ്‌ക്കൊപ്പം പെരുമ്പാവൂര്‍ താലൂക്ക് ആശുപത്രിയിലായിരുന്നു ദീപ. അതുകൊണ്ടുതന്നെ ദീപയെ കൃത്യമായി ചോദ്യംചെയ്യാനോ വിവരങ്ങള്‍ ശേഖരിക്കാനോ പോലീസിനു കഴിഞ്ഞിരുന്നില്ല.
ഇതുവരെ കസ്റ്റഡിയിലായവരില്‍ നിന്നു കൊലപാതകവുമായി ബന്ധപ്പെട്ട യാതൊരു വിവരവും ലഭിച്ചിട്ടുമില്ല. ഈ സാഹചര്യത്തിലാണ് ദീപയെ കസ്റ്റഡിയിലെടുത്ത് ചോദ്യം ചെയ്തത്. ദീപയില്‍നിന്നു ലഭിച്ച വിവരങ്ങളുടെ അടിസ്ഥാനത്തിലാണ് ഭായ് എന്നു വിളിക്കുന്ന ആളിനായി ബംഗാളിലേക്ക് അന്വേഷണം തിരിഞ്ഞിരിക്കുന്നത്. ഇതുമായി ബന്ധപ്പെട്ട കൂടുതല്‍ കാര്യങ്ങള്‍ ദീപയില്‍ നിന്നും ചോദിച്ചറിഞ്ഞുവെന്നാണ് ലഭിക്കുന്ന വിവരം.
മലയാളം അറിയാവുന്ന ബംഗാള്‍ സ്വദേശിയിലേക്കാണു പോലീസ് അന്വേഷണം നീളുന്നത്. വീട് നിര്‍മാണത്തിനു വന്നവരില്‍നിന്നു ജിഷയ്ക്കും അമ്മയ്ക്കും ഭീഷണിയുണ്ടായിരുന്നെന്നു ദീപ പോലീസിനു മൊഴി നല്‍കിയിരുന്നു. നിര്‍മാണത്തിനിടെ കൂലിത്തര്‍ക്കമുണ്ടായെന്ന മറ്റൊരു മൊഴിയും പോലീസിനു കിട്ടിയിട്ടുണ്ട്.
Discussion about this post