ഇന്ധനവില വര്‍ദ്ധിച്ചു

ന്യൂഡല്‍ഹി: ഇന്ധനവില വര്‍ധിപ്പിച്ചു. പെട്രോള്‍ ലിറ്ററിന് 2.21 രൂപയും ഡീസലിന് 1.79 രൂപയുമാണ് വര്‍ധിപ്പിച്ചത്. പുതുക്കിയ നിരക്ക്  പ്രാബല്യത്തില്‍ വന്നു.

കഴിഞ്ഞതവണ ഇന്ധന വില പുനര്‍നിര്‍ണയിച്ചപ്പോള്‍ പെട്രോള്‍ വിലയില്‍ 13 പൈസയുടെ വര്‍ധനവ് വരുത്തിയിരുന്നു. നവംബര്‍ 15നും എണ്ണക്കമ്പനികള്‍ പെട്രോള്‍, ഡീസല്‍ വിലയില്‍ മാറ്റം വരുത്തിയിരുന്നു. അന്ന് പെട്രോളിന് 1.46 രൂപയും, ഡീസലിന് 1.53 രൂപയും കുറച്ചു. തുടര്‍ച്ചയായ മൂന്നു വിലവര്‍ധനവിന് ശേഷമാണ് നവംബര്‍ 15ന് വില കുറച്ചത്.

റഷ്യയും എണ്ണ കയറ്റുമതി രാജ്യങ്ങളുടെ സംഘടന (ഒപെക്) യില്‍പെടാത്ത മറ്റു രാജ്യങ്ങളും ക്രൂഡ് ഓയില്‍ ഉത്പാദനം കുറയ്ക്കാന്‍ സമ്മതിച്ചിരുന്നതോടെ ഇന്ധനവില ഉയരുമെന്ന് ഏറെക്കുറെ ഉറപ്പായിരുന്നു. തലേ രണ്ടാഴ്ചത്തെ ശരാശരി ഇറക്കുമതിവില നോക്കിയാണ് ഇന്ത്യയില്‍ പൊതുമേഖലാ എണ്ണ കമ്പനികള്‍ വില നിശ്ചയിക്കുന്നത്.