മടവീഴ്ച: അടിയന്തിര ധനസഹായമായി കൃഷി വകുപ്പ് 56.90 ലക്ഷം അനുവദിച്ചു

ആലപ്പുഴ: പ്രളയ ദുരിതാശ്വാസ നടപടിയുടെ ഭാഗമായി മടവീഴ്ചയുണ്ടായ 54 പാടശേഖര സമിതികള്‍ക്ക് മട കുത്തുന്നതിനായി എസ്റ്റിമേറ്റ് തുകയുടെ 20 ശതമാനം തുക മുന്‍കൂറായി 56.90 ലക്ഷം രൂപയുടെ അടിയന്തിര ധനസഹായം കൃഷി വകുപ്പില്‍ നിന്നും അനുവദിച്ചു.

മട വീഴ്ച സംഭവിച്ച പാടശേഖരങ്ങളില്‍ യുദ്ധകാലാടിസ്ഥാനത്തില്‍ മട കുത്തുന്നതിനുള്ള നടപടികള്‍ പാടശേഖര സമിതികള്‍ സ്വീകരിച്ചിട്ടുണ്ട്. കൈനകരി പഞ്ചായത്തില്‍ 27.54 ലക്ഷം രൂപയും ചമ്പകുളം പഞ്ചായത്തില്‍ 3.44 ലക്ഷം രൂപയും കരുവാറ്റ പഞ്ചായത്തില്‍ 50000 രൂപയും അമ്പലപ്പുഴ നോര്‍ത്ത് പഞ്ചായത്തില്‍ 20000 രൂപയും അമ്പലപ്പുഴ സൗത്ത് പഞ്ചായത്തില്‍ 56000 രൂപയും തകഴി പഞ്ചായത്തില്‍ 5.84 ലക്ഷം രൂപയും നെടുമുടി പഞ്ചായത്തില്‍ 1.61 ലക്ഷം രൂപയും എടത്വ പഞ്ചായത്തില്‍ 3.88 ലക്ഷം രൂപയും പുന്നപ്ര നോര്‍ത്ത് പഞ്ചായത്തില്‍ 46000 രൂപയും പുന്നപ്ര സൗത്ത് പഞ്ചായത്തിലും പുറക്കാട് പഞ്ചായത്തിലും ഒരുലക്ഷം രൂപ വീതവും പുളിങ്കുന്ന് പഞ്ചായത്തില്‍ 3.50 ലക്ഷം രൂപയും ആലപ്പുഴ മുന്‍സിപ്പാലിറ്റിയില്‍ 7.37 ലക്ഷം രൂപയുടേയും ധനസഹായമാണ് അനുവദിച്ചിരിക്കുന്നത്. കൃഷി വകുപ്പില്‍ നിന്നും ദ്രുതകര്‍മ്മ സേനയെ മട കുത്തുന്നത് നിരീക്ഷിക്കുന്നതിനായി പ്രിന്‍സിപ്പല്‍ കൃഷി ഓഫീസര്‍ നിയോഗിച്ചു.