കരുണാനിധി അന്തരിച്ചു

ചെന്നൈ: തമിഴ്‌നാട് മുന്‍ മുഖ്യമന്ത്രിയും ഡിഎംകെ അധ്യക്ഷനുമായ എം. കരുണാനിധി (94) അന്തരിച്ചു.  കാവേരി ആശുപത്രിയില്‍ പ്രവേശിപ്പിച്ച അദ്ദേഹത്തിന്റെ നില ഇന്ന് കൂടുതല്‍ വഷളായി. വൈകിട്ട് 6.10നായിരുന്നു അന്ത്യം. മകനും ഡിഎംകെ വര്‍ക്കിങ് പ്രസിഡന്റുമായ എം.കെ.സ്റ്റാലിനും കുടുംബാംഗങ്ങളും മരണസമയത്ത് ആശുപത്രിയിലുണ്ടായിരുന്നു.

ജൂലൈ 19 ന് അദ്ദേഹത്തെ ശ്വസനം സുഗമമാക്കുന്നതിനായി കഴുത്തില്‍ ഘടിപ്പിച്ചിരുന്ന ട്രക്കിയസ്റ്റമി ട്യൂബ് മാറ്റി സ്ഥാപിക്കാനുള്ള ശസ്ത്രക്രിയയ്ക്കു  വിധേയനാക്കിയിരുന്നു.  ശസ്ത്രക്രിയയ്ക്കു ശേഷം പനിയും മൂത്രനാളിയിലെ അണുബാധയും ബാധിച്ചതിനെത്തുടർന്ചികില്‍സയ്ക്കായി അദ്ദേഹത്തിന്റെ  ഗോപാലപുരത്തെ വീട്ടില്‍ ആശുപത്രിക്കു സമാനമായ ചികില്‍സാ സംവിധാനങ്ങള്‍ ഒരുക്കിയിരുന്നു. തുടര്‍ന്ന് നില വഷളായതിനെത്തുടര്‍ന്ന് ജൂലൈ 29ന് കാവേരി ആശുപത്രിയിലേക്കു മാറ്റുകയായിരുന്നു.

1924 ജൂണ്‍ മൂന്നിന് നാഗപട്ടണം ജില്ലയിലെ തിരുകുവളെയിലാണ് കരുണാനിധിയുടെ ജനനം. ഇ.വി. രാമസ്വാമിയുടെ ശിഷ്യനായാണ് പൊതുപ്രവര്‍ത്തനം തുടങ്ങിയത്. 1957 ല്‍ കുളിത്തലൈയിത്തില്‍ നിന്നു വിജയിച്ച് എംഎല്‍എയായി. 1961 ല്‍ പാര്‍ട്ടി ട്രഷററായ അദ്ദേഹം 1962 ല്‍ നിയമസഭയിലെ പ്രതിപക്ഷ ഉപനേതാവായി. 1967 ല്‍  പൊതുമരാമത്ത് മന്ത്രിയായി. 1969 ല്‍ അണ്ണാദുരെയുടെ നിര്യാണത്തെത്തുടര്‍ന്ന് ഡിഎംകെ അധ്യക്ഷനും തുടർന്ന് മുഖ്യമന്ത്രിയുമായി. എംജിആറിന്റെ മരണശേഷം 1989 ലാണ് കരുണാനിധി  പിന്നീട് മുഖ്യമന്ത്രി സ്ഥാനത്തെത്തുന്നത്. 1996 മുതല്‍ 2001 വരെയും 2006 മുതല്‍ 2011 വരെയും വീണ്ടും മുഖ്യമന്ത്രിയായി.  2018 ജൂലൈ 27 ന് അദ്ദേഹം ഡിഎംകെ അധ്യക്ഷസ്ഥാനത്ത് 49 വര്‍ഷം പൂര്‍ത്തിയാക്കിയിരുന്നു.

രാഷ്ട്രപതി റാംനാഥ് കോവിന്ദ്, ഉപരാഷ്ട്രപതി എം.വെങ്കയ്യനായിഡു, കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി, കേരള മുഖ്യമന്ത്രി പിണറായി വിജയന്‍, ചലച്ചിത്രതാരങ്ങളായ രജനീകാന്ത്, കമല്‍ഹാസന്‍, വിജയ്, അജിത് തുടങ്ങി നിരവധി പ്രമുഖർ അദ്ദേഹത്തെ ആശുപത്രിയില്‍ സന്ദര്‍ശിച്ചിരുന്നു.

മൂന്നു ഭാര്യമാര്‍:  പരേതയായ പത്മാവതി അമ്മാള്‍, രാജാത്തി അമ്മാള്‍, ദയാലു അമ്മാള്‍ എന്നിവരാണ് ഭാര്യമാർ. എം.കെ.സ്റ്റാലിന്‍, എം.കെ. അഴഗിരി, കനിമൊഴി, എം.കെ. മുത്തു, എം.കെ. തമിഴരശ്, എം.കെ. സെല്‍വി എന്നിവർ മക്കളും.

മാക്സിം ഗോര്‍ക്കിയുടെ ‘ മദറി’ന്റെ തമിഴ് പരിഭാഷ ഉള്‍പ്പെടെ ഇരുനൂറോളം പുസ്തകങ്ങള്‍ രചിച്ചിട്ടുണ്ട്. എഴുപതോളം സിനിമകള്‍ക്ക് തിരക്കഥയും രചിച്ചിട്ടുണ്ട്.