ബെംഗളൂരു: വിശ്വാസവോട്ടെടുപ്പില് കോണ്ഗ്രസ്-ജനതാദള് (എസ്) സര്ക്കാര് താഴെവീണ സാഹചര്യത്തില് ബിഎസ് യെദ്യൂരപ്പയുടെ നേതൃത്വത്തില് ബിജെപി വീണ്ടും അധികാരത്തിലെത്തും. യെദ്യൂരപ്പ വ്യാഴാഴ്ച മുഖ്യമന്ത്രിയായി സത്യപ്രതിജ്ഞ ചെയ്യുമെന്നാണ് പ്രാഥമിക വിവരം.
സര്ക്കാര് രൂപവത്കരിക്കാന് ബി.ജെ.പി. ബുധനാഴ്ച അവകാശവാദമുന്നയിക്കുമെന്ന് മുതിര്ന്ന നേതാവ് ആര്. അശോക് പറഞ്ഞു. സ്വതന്ത്രന് അടക്കം രണ്ടുപേരുടെ പിന്തുണയോടെ പാര്ട്ടിക്ക് 107 പേരുടെ അംഗബലമുണ്ട്. 2007-ലാണ് യെദ്യൂരപ്പ ആദ്യമായി മുഖ്യമന്ത്രിയായത്. ആര്.എസ്.എസിലൂടെയാണ് യെദ്യൂരപ്പ രാഷ്ട്രീയത്തില് സജീവമായത്. കര്ണാടകത്തിലെ പ്രബലമായ ലിംഗായത്ത് സമുദായത്തിന്റെ വലിയ പിന്തുണ അദ്ദേഹത്തിനുണ്ട്. ജനപിന്തുണ പരിഗണിച്ചാണ് 76-കാരനായ യെദ്യൂരപ്പയെ ബി.ജെ.പി. കേന്ദ്രനേതൃത്വം മുഖ്യമന്ത്രിസ്ഥാനാര്ഥിയായി വീണ്ടും പ്രഖ്യാപിച്ചത്. 75 വയസ്സുകഴിഞ്ഞവരെ പദവിയില്നിന്നു മാറ്റിനിര്ത്താനുള്ള തീരുമാനം ഇളവുചെയ്താണ് അദ്ദേഹത്തെ തുടരാന് അനുവദിച്ചത്. ലോക്സഭാ തിരഞ്ഞെടുപ്പില് 28 സീറ്റില് 25 എണ്ണത്തിലും ബി.ജെ.പി. ജയിച്ചതും അദ്ദേഹത്തിന്റെ സ്വാധീനം ഉറപ്പിക്കുന്നതായി.
ബി.ജെ.പി. സംസ്ഥാനാധ്യക്ഷന് ദേശീയ ഉപാധ്യക്ഷന് തുടങ്ങി വിവിധ പദവികള് വഹിച്ച യെദ്യൂരപ്പ ശിവമോഗയിലെ ശിക്കാരിപുരയില് നിന്ന് തുടര്ച്ചയായി ആറുതവണ തിരഞ്ഞെടുക്കപ്പെട്ടു. 2014-ല് നടന്ന ലോക്സഭാ തിരഞ്ഞെടുപ്പില് സംസ്ഥാനത്തെ ഏറ്റവുംവലിയ ഭൂരിപക്ഷത്തിനാണ് ശിവമോഗയില് നിന്നു ജയിച്ചത്.
Discussion about this post