തിരുവനന്തപുരം: പ്രളയക്കെടുതിയില്‍ ദുരിതമനുഭവിക്കുന്നവര്‍ക്കുവേണ്ടി സമാഹരിക്കുന്ന അക്കൗണ്ടില്‍ നിന്നും പണം തട്ടാന്‍ സംഘം. വ്യാജ ഐ.ഡിയുണ്ടാക്കിയ സംഭവത്തില്‍ സൈബര്‍ പോലീസ് കേസ് രജിസ്റ്റര്‍ ചെയ്തു. ഡിജിപി ലോക്നാഥ് ബെഹ്റയുടെ നിര്‍ദ്ദേശപ്രകാരമാണ് കേസ് എടുത്തത്.
തട്ടിപ്പ് കണ്ടെത്തിയതിനെ തുടര്‍ന്ന് വ്യാജ ഐഡി അക്കൗണ്ടില്‍ നിന്ന് നീക്കിയിട്ടുണ്ട്. keralacmdrf@sbi എന്ന ഔദ്യോഗിക ഐ ഡിലെ കേരള എന്ന ഇംഗ്ലീഷ് പദത്തിന്റെ ആദ്യ a മാറ്റി e എന്നാക്കി kerelacmdrf@sbi എന്ന വ്യാജ യു.പി.ഐ(യൂനിഫൈഡ് പേമെന്റസ് ഇന്റര്‍ഫേസ്) വിലാസമുണ്ടാക്കിയാണ് തട്ടിപ്പ് നടത്തിയത്. വ്യാജ ഐഡി വേഗത്തില്‍ ആര്‍ക്കും തിരിച്ചറിയാന്‍ കഴിയില്ല. സന്ദീപ് സബജീത്ത് യാദവ് എന്നയാളുടെ പേരിലാണ് വ്യാജ യു.പി.ഐ ഐ.ഡി കണ്ടെത്തിയിരിക്കുന്നത്.
തട്ടിപ്പ് പുറത്തുവന്നത്തോടെ ചൊവ്വാഴ്ച തന്നെ പൊലീസ് പ്രാഥമിക അന്വേഷണം നടത്തിയിരുന്നു. യു.പി.ഐ കൈകാര്യം ചെയ്യുന്ന ഔദ്യോഗിക സ്ഥാപനമായ നാഷണല്‍ പേമെന്റ് കോര്‍പറേഷന്‍ ഓഫ് ഇന്ത്യയോട് വിവരം കൈമാറിയിരുന്നു. ഇതേതുടര്‍ന്ന് വ്യാജ ഐ.ഡി പിന്‍വലിക്കുകയായിരുന്നു.
Discussion about this post