ന്യൂഡല്ഹി: ഐ.എന്.എക്സ് മീഡിയ അഴിമതി കേസില് സി.ബി.ഐ അറസ്റ്റ് ചെയ്ത മുന്കേന്ദ്രമന്ത്രിയും മുതിര്ന്ന കോണ്ഗ്രസ് നേതാവുമായ പി.ചിദംബരത്തിന്റെ ജാമ്യാപേക്ഷ കോടതി പരിഗണിക്കാനിരിക്കെ പുതിയ തെളിവുകളുമായി എന്ഫോഴ്സ്മെന്റ് ഡയറക്ടറേറ്റ് (ഇ.ഡി). ചിദംബരത്തിന്റെ വിദേശനിക്ഷേപം അടക്കമുള്ള തെളിവുകളും അദ്ദേഹം തെളിവ് നശിപ്പിക്കാനും സാക്ഷികളെ സ്വാധീനിക്കാനും ശ്രമിച്ചതിന്റെ വിവരങ്ങളുമാണ് ഇ.ഡിക്ക് ലഭിച്ചത്. ഇക്കാര്യം ഇന്ന് സുപ്രീം കോടതിയില് സമര്പ്പിക്കുമെന്ന് ഇ.ഡി വൃത്തങ്ങള് അറിയിച്ചു.
ചിദംബരത്തിന് 12 രാജ്യങ്ങളില് നിക്ഷേപമോ വസ്തുവകകളോ ഉണ്ടെന്ന് സാമ്പത്തിക കുറ്റകൃത്യങ്ങള് അന്വേഷിക്കുന്ന രഹസ്യാന്വേഷ വിഭാഗത്തിന് തെളിവ് ലഭിച്ചിട്ടുണ്ട്. 17 രാജ്യങ്ങളില് ചിദംബരം ബാങ്ക് അക്കൗണ്ടുകള് തുറന്ന് ക്രയവിക്രയങ്ങള് നടത്തിയതായി തെളിവ് ലഭിച്ചു. വിദേശരാജ്യങ്ങളില് ഷെല് കമ്പനികള് രൂപീകരിച്ചാണ് നിക്ഷേപം നടത്തിയത്. എന്നാല് ഏജന്സികള് അന്വേഷണം തുടങ്ങിയതോടെ ഈ കമ്പനികളുടെ ഡയറക്ടര്മാരെ മാറ്റി തെളിവ് നശിപ്പിക്കാന് ശ്രമിച്ചു. ഐ.എന്.എക്സ് കമ്പനിക്ക് വിദേശനിക്ഷേപം അനുവദിക്കുന്നതുമായി ബന്ധപ്പെട്ട് കമ്പനിയും ചിദംബരവും തമ്മില് നടത്തിയ ചര്ച്ചയുടെ ഇടനിലക്കാരില് രണ്ട് പേരെ പിടികൂടാന് കഴിഞ്ഞിട്ടുണ്ട്.
കള്ളപ്പണം വെളുപ്പിക്കലുമായി ബന്ധപ്പെട്ട് ഇ-മെയില് തെളിവുകളും ലഭിച്ചിട്ടുണ്ട്. കഴിഞ്ഞ ഡിസംബറിലും ജനുവരിയിലും ഐ.എന്.എക്സ് മീഡിയ കേസില് ചോദ്യം ചെയ്യാനായി വിളിപ്പിച്ചെങ്കിലും ചിദംബരം ഇതിനോട് സഹകരിച്ചില്ല. അതിനാല് ചിദംബരത്തെ കസ്റ്റഡിയിലെടുത്ത് ചോദ്യം ചെയ്യണമെന്നും ഇ.ഡി സുപ്രീം കോടതിയില് ആവശ്യപ്പെടും.അതേസമയം, സി.ബി.ഐ എടുത്ത അഴിമതിക്കേസില് ജാമ്യം തേടിയും നാല് ദിവസം കസ്റ്റഡിയില് വിട്ട സി.ബി.ഐ കോടതി ഉത്തരവ് ചോദ്യം ചെയ്തും ചിദംബരം നല്കിയ ഹര്ജികള് ഇന്ന് കോടതി പരിഗണിക്കും.
Discussion about this post