ലഹോര്: ഇന്ത്യയുമായി സെപ്റ്റംബറിലോ ഒക്ടോബറിലെ യുദ്ധമുണ്ടാകുമെന്നു പാക്ക് മന്ത്രി പ്രഖ്യാപിച്ചതിനു പിന്നാലെ ബാലിസ്റ്റിക് മിസൈല് പരീക്ഷണം. കരയില് നിന്നു കരയിലേക്കു തൊടുക്കാവുന്ന മിസൈലാണ് രാത്രിയില് പാക്കിസ്ഥാന് പരീക്ഷിച്ചത്. ഇതിന്റെ വിഡിയോയും പുറത്തുവിട്ടു. 290 കിലോമീറ്റര് വരെ ദൂരത്തേക്ക് പലതരം പോര്മുനകള് വഹിക്കാന് ശേഷിയുള്ളതാണ് മിസൈല്. പാക്കിസ്ഥാന് സൈനിക വക്താവാണ് മിസൈല് പരീക്ഷണം സ്ഥിരീകരിച്ചത്. പാക്ക് ആക്രമണസാധ്യതയുള്ളതിനാല് ഗുജറാത്ത് തീരത്ത് ജാഗ്രത പാലിക്കാന് നിര്ദേശം ഇന്ത്യന് ആഭ്യന്തരമന്ത്രാലയം നിര്ദ്ദേശം നല്കിയിട്ടുണ്ട്.
മിസൈല് പരീക്ഷണം നടക്കുന്നതിനാല് ഓഗസ്റ്റ് 28 മുതല് 31 വരെ പാക്കിസ്ഥാനു മുകളിലൂടെയുള്ള മൂന്ന് വ്യോമപാതകള് താല്ക്കാലികമായി അടച്ചിടുമെന്ന് പാക്കിസ്ഥാന് ഇന്നലെ വ്യക്തമാക്കിയിരുന്നു. ഈ കാലയളവില് ഇതുവഴിയുള്ള വ്യോമഗതാഗതം ഒഴിവാക്കണമെന്നായിരുന്നു രാജ്യാന്തര വിമാന സര്വീസുകള്ക്കുള്ള നിര്ദേശം. ഇതിനു പകരമായി മറ്റൊരു വ്യോമപാത അനുവദിച്ചതായും റിപ്പോര്ട്ടുകളുണ്ട്. പാക്കിസ്ഥാന് സാങ്കേതിക വകുപ്പ് മന്ത്രി ഫവാദ് ഹുസൈന് ചൗധരി ഇന്ത്യയിലേക്കുള്ള വ്യോമപാതകള് അടച്ചിടുമെന്നു നേരത്തേ പറഞ്ഞിരുന്നു. പാക്കിസ്ഥാനിലൂടെ അഫ്ഗാനിസ്ഥാനിലേക്ക് ഇന്ത്യയ്ക്കുള്ള വാണിജ്യ ബന്ധവും തടസ്സപ്പെടുത്താന് പാക്കിസ്ഥാന് ആലോചിക്കുന്നുണ്ട്.
ബാലാക്കോട്ടിലെ ഭീകരകേന്ദ്രങ്ങള് ഇന്ത്യ ആക്രമിച്ചു തകര്ത്തതിനു പിന്നാലെ ഫെബ്രുവരി 26ന് പാക്കിസ്ഥാന് വ്യോമപാത അടച്ചിരുന്നു. കഴിഞ്ഞ ജൂലൈ 16 നാണ് പാക്കിസ്ഥാന് വ്യോമപാത പൂര്ണമായും തുറന്നത്. ജമ്മു കശ്മീരിന്റെ പ്രത്യേക പദവി റദ്ദാക്കിയതിനു പിന്നാലെ ഇന്ത്യയിലേക്കുള്ള റോഡ്,റെയില് ഗതാഗതവും വാണിജ്യ ബന്ധവും പാക്കിസ്ഥാന് നിര്ത്തിവച്ചിരുന്നു.
Discussion about this post