ന്യൂഡല്ഹി: ഐഎന്എക്സ് മീഡിയ കേസില് ജുഡീഷല് കസ്റ്റഡിയില് വിട്ട മുന് ധനമന്ത്രി പി. ചിദംബരം തിഹാര് ജയിലിലെ ഏഴാം നമ്പര് മുറിയില്. ജയിലിലെ ഒമ്പതാം വാര്ഡിലെ ഏഴാം നമ്പര് മുറിയാണ് മുന് കേന്ദ്രമന്ത്രിക്കായി അനുവദിച്ചിരിക്കുന്നത്. ഇവിടെ അറുനൂറിനും എഴുനൂറിനും ഇടയില് തടവുകാരാണ് ഉള്ളത്. ഇവരില് ഭൂരിപക്ഷവും സ്ത്രീകള്ക്കെതിരായ കുറ്റത്തിന് ശിക്ഷിക്കപ്പെട്ടവരാണ്. സാമ്പത്തിക കുറ്റകൃത്യങ്ങളില് പിടിയിലായവരെ പാര്പ്പിക്കാന് ഉപയോഗിക്കുന്നയിടമായിരുന്നു ഏഴാം നമ്പര് ജയില്. ചിദംബരത്തിന് ജയിലില് കട്ടില്, പാശ്ചാത്യ സൗകര്യങ്ങളുള്ള ശുചിമുറി, മരുന്നുകള് തുടങ്ങിയവ അനുവദിച്ചിട്ടുണ്ട്. അദ്ദേഹം 19 വരെ ജയിലില് തുടരും. ഇസഡ് കാറ്റഗറി സുരക്ഷയുള്ളതിനാല് പ്രത്യേക സെല്ലിലാകും ചിദംബരത്തെ താമസിപ്പിക്കുന്നത്. സാധാരണ തടവുകാരെപ്പോലെയാണ് ചിദംബരത്തെയും പരിഗണിക്കുകയെന്ന് ജയില് ഡിജിപി സന്ദീപ് ഗോയല് പറഞ്ഞു. ജയില് ജയിലാണ്. കോടതിയുടെ ഉത്തരവുകള് പിന്തുടരുക മാത്രമാണ് തങ്ങള് ചെയ്യുന്നത്. സാധാരണ തടവുകാരെ പോലെയാകും ചിദംബരത്തെയും പരിഗണിക്കുകയെന്നും അദ്ദേഹം പറഞ്ഞു. രാത്രിയോടെയാണ് ചിദംബരത്തെ തിഹാര് ജയിലിലേക്കു മാറ്റിയത്. പോലീസ് വാനിലാണ് ജയിലലേക്ക് കൊണ്ടുപോയത്. നേരത്തെ ചിദംബരത്തിന്റെ മകന് കാര്ത്തിയും തിഹാറില് കഴിഞ്ഞിട്ടുണ്ട്. ഐഎന്എക്സ് മീഡിയ കേസില് എന്ഫോഴ്സ്മെന്റ് ഡയറക്ടറേറ്റിന്റെ അറസ്റ്റില് നിന്നു മുന്കൂര് ജാമ്യത്തിനും സിബിഐയുടെ അറസ്റ്റ് നടപടികളെ ചോദ്യം ചെയ്തും നല്കിയ ഹര്ജികള് സുപ്രീംകോടതി തള്ളിയതോടെയാണ് ചിദംബരത്തിന്റെ തിഹാര് ജയില് വാസം ഏറെക്കുറെ ഉറപ്പിച്ചത്. എന്ഫോഴ്സ്മെന്റ് ഡയ റക്ടറേറ്റും സിബിഐയും നല്കിയ തെളിവുകള് കണക്കിലെടുത്താല് നിലവിലുള്ള അന്വേഷണത്തില് ഇടപെടാനാവില്ലെന്നു ജസ്റ്റീസുമാരായ ആര്. ഭാനുമതി, എ.എസ്. ബോപ്പണ്ണ എന്നിവരുടെ ബെഞ്ച് വ്യക്തമാക്കി. സാമ്പത്തിക ക്രമക്കേടുമായി ബന്ധപ്പെട്ട കേസില് മുന്കൂര് ജാമ്യം അനുവദിക്കാനാവില്ലെന്നും 57 പേജുള്ള വിധിയില് കോടതി സൂചിപ്പിക്കുന്നു.
ഐഎന്എക്സ് മീഡിയ കേസ്: ചിദംബരം തിഹാര് ജയിലില്
പുതിയ വാർത്തകൾ
Discussion about this post