മുംബൈ: വാണിജ്യ ബാങ്കുകളുടെ ഭവന – വ്യക്തിഗത വായ്പകള്‍ക്കു പലിശയില്‍ നേരിയ കുറവ് വരും. ഒരു ബാഹ്യനിരക്കുമായി ബന്ധിപ്പിച്ചുവേണം പലിശ നിര്‍ണയിക്കാന്‍ എന്ന റിസര്‍വ് ബാങ്ക് നിര്‍ദേശം ഇന്നു നടപ്പാക്കുന്നതോടെയാണിത്. ഇതുവരെ ബാങ്കുകള്‍ തങ്ങളുടെ ചെലവുമായി ബന്ധിപ്പിച്ചായിരുന്നു പലിശ നിര്‍ണയിച്ചിരുന്നത്. ഇനി സ്വതന്ത്രമായ ഒരു ബാഹ്യനിരക്കാണു മാനദണ്ഡമാക്കേണ്ടത്.സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) റിസര്‍വ് ബാങ്കിന്റെ റീപോ നിരക്ക് ബാഹ്യമാനദണ്ഡമാക്കി. റിസര്‍വ് ബാങ്ക് വാണിജ്യബാങ്കുകള്‍ക്ക് ഏകദിന വായ്പ നല്‍കുന്‌പോള്‍ ഈടാക്കുന്ന പലിശയാണു റീപോനിരക്ക്. ഇപ്പോള്‍ 5.4 ശതമാനമാണു റീപോ നിരക്ക്.
റീപോ നിരക്കിനേക്കാള്‍ 2.65 ശതമാനം കൂട്ടിയാണ് എസ്ബിഐ പലിശ നിശ്ചയിക്കുക. വായ്പ എടുക്കുന്നവരുടെ നഷ്ടസാധ്യത കണക്കിലെടുത്ത് ഒരു പ്രീമിയവും ഈടാക്കും. എസ്ബിഐയുടെ കുറഞ്ഞ വായ്പാ പലിശ ഇങ്ങനെ 8.20 ശതമാനമായി നിശ്ചയിച്ചു. (റീപോ 5.4, സ്‌പ്രെഡ് 2.65, പ്രിമയം 0.15 മൂന്നും കൂടി 8.20 ശതമാനം).മറ്റു ബാങ്കുകളും സമാന മാനദണ്ഡങ്ങള്‍ പ്രഖ്യാപിച്ച് പലിശ പുതുക്കും. റിസര്‍വ് ബാങ്ക് റീപോ നിരക്ക് മാറ്റുന്നതനുസരിച്ച് വായ്പാ പലിശയില്‍ മാറ്റം വരും എന്നതാണ് ഈ രീതിയുടെ ഗുണം.
Discussion about this post