ന്യൂഡല്ഹി : അയോദ്ധ്യ കേസ് വാദം അന്തിമഘട്ടത്തിലേക്ക് കടക്കുമ്പോള് കോടതി നാടകീയ രംഗങ്ങള്ക്ക് വേദിയായി. ഹിന്ദു മഹാസഭയുടെ അഭിഭാഷകന് ഹാജരാക്കിയ രേഖ മുസ്ലിം വിഭാഗത്തിന്റെ അഭിഭാഷകന് രാജീവ് ധവാന് കോടതിയില് വലിച്ചു കീറി. ഇത്തരം നടപടികളാണ് ഉദ്ദേശിക്കുന്നതെങ്കില് തങ്ങള് ഇറങ്ങിപ്പോകുന്നതാണ് നല്ലതെന്ന് ചീഫ് ജസ്റ്റിസ് പറഞ്ഞു.
ഹിന്ദു മഹാസഭയ്ക്ക് വേണ്ടി ഹാജരായ അഭിഭാഷകന് വികാസ് സിംഗ് മുന് ഐപിഎസ് ഓഫീസര് കിഷോര് കുനാലിന്റെ അയോദ്ധ്യ റീ വിസിറ്റഡ് എന്ന പുസ്തകത്തിലെ മാപ്പും രേഖകളും കോടതിയില് സമര്പ്പിച്ചതോടെയാണ് തര്ക്കം തുടങ്ങിയത്. ഇത് പരിഗണിക്കാനാവില്ലെന്ന് സുന്നി വഖഫ് ബോര്ഡ് അഭിഭാഷകന് രാജീവ് ധവാന് വ്യക്തമാക്കി. തുടര്ന്ന് സിംഗില് നിന്ന് രേഖകള് വാങ്ങി വലിച്ചു കീറിക്കളയുകയായിരുന്നു.
ഇതിനെതിരെ ശക്തമായ ഭാഷയിലായിരുന്നു ചീഫ് ജസ്റ്റിസിന്റെ പ്രതികരണം. കോടതിയുടെ അന്തസ്സിനെ ഹനിക്കുന്ന നടപടിയാണിതെന്നും ഇങ്ങനെ തുടങ്ങിയാല് തങ്ങള് ഇറങ്ങിപ്പോകുന്നതാണ് നല്ലതെന്നും ചീഫ് ജസ്റ്റിസ് രഞ്ജന് ഗോഗോയ് പ്രതികരിച്ചു. എന്നാല് താന് കോടതിയുടെ അന്തസ്സിനെ ബാധിക്കുന്ന ഒന്നും ചെയ്തില്ലെന്ന് ഹിന്ദു മഹാസഭയുടെ അഭിഭാഷകന് വ്യക്തമാക്കി.
അതേസമയം സുപ്രീം കോടതി നിയോഗിച്ച മദ്ധ്യസ്ഥ സമിതി കോടതിയില് റിപ്പോര്ട്ട് സമര്പ്പിച്ചു. അലഹബാദ് ഹൈക്കോടതി വിധിക്കെതിരെ ഫയല് ചെയ്ത കേസ് സുന്നി വഖഫ് ബോര്ഡ് പിന്വലിക്കാന് തയ്യാറാണെന്ന് അറിയിച്ചതായും സൂചനകളുണ്ട്. വാദം ഇന്ന് പൂര്ത്തിയാക്കണമെന്നാണ് ചീഫ് ജസ്റ്റിസ് നിര്ദ്ദേശിച്ചിട്ടുള്ളത്.
Discussion about this post