ന്യൂഡല്ഹി: അയോധ്യ ഭൂമി തര്ക്കം സംബന്ധിച്ച കേസ് 40 ദിവസം തുടര്ച്ചയായി നടന്ന വാദം കേള്ക്കലിനുശേഷം സുപ്രീംകോടതി വിധി പറയാനായി മാറ്റിയതിനു പിന്നാലെ തുടര് നടപടികള് ആലോചിക്കാന് ഭരണഘടനാ ബെഞ്ചിലെ ജഡ്ജിമാര് ഇന്ന് യോഗം ചേരും. ചീഫ് ജസ്റ്റീസ് രഞ്ജന് ഗൊഗോയിയുടെ ചേംബറിലാണ് യോഗം. അയോധ്യ പ്രശ്നത്തിലെ മധ്യസ്ഥ ചര്ച്ചകള് വിജയം കണ്ടെന്ന് റിട്ട ജസ്റ്റീസ് ഖലീഫുള്ള അധ്യക്ഷനായ സമിതി റിപ്പോര്ട്ട് നല്കിയിരുന്നു. ഈ റിപ്പോര്ട്ടും ജഡ്ജിമാര് പരിശോധിക്കും. നവംബര് 17ന് ചീഫ് ജസ്റ്റീസ് സ്ഥാനത്ത് നിന്ന് രഞ്ജന് ഗൊഗോയി വിരമിക്കും. ആയിരക്കണക്കിന് രേഖകളുള്ള കേസില് അതിന് മുമ്പ് വിധി പറയും എന്നാണ് സൂചന. ഒപ്പം മധ്യസ്ഥ ചര്ച്ചയിലുണ്ടായ പുരോഗതിയും പ്രധാന വിഷയമാണ്. ഇക്കാര്യങ്ങളില് എന്ത് തീരുമാനങ്ങളിലേക്ക് പോകണം എന്നതും ജഡ്ജിമാര് ഇന്ന് ചര്ച്ച ചെയ്യും.
Discussion about this post