ചെന്നൈ: ഐ.എ.എസ് ഉദ്യോഗസ്ഥനും മുന് മുഖ്യ തെരഞ്ഞെടുപ്പ് കമ്മീഷണറുമായിരുന്ന ടി.എന് ശേഷന്(86) അന്തരിച്ചു. അദ്ദേഹത്തിന്റെ ചെന്നൈയിലുള്ള വസതിയില് വച്ചാണ് അന്ത്യം സംഭവിച്ചത്. വാര്ദ്ധക്യ സഹജമായ അസുഖങ്ങളെ തുടര്ന്നാണ് മരണം സംഭവിച്ചത്. ദീര്ഘ നാളുകളായി അദ്ദേഹം ചികിത്സയിലായിരുന്നു. രാജ്യത്ത് തെരഞ്ഞെടുപ്പുകള് നടക്കുമ്പോള് ഉണ്ടാകുന്ന അധിക ചിലവിനും അഴിമതിക്കും ജനങ്ങളെ കാരണമില്ലാതെ ഉപദ്രവിക്കുന്നതിനും എതിരെ മലയാളി കൂടിയായ ടി.എന് ശേഷന് സ്വീകരിച്ചിരുന്ന നിലപാടുകള് വളരെയധികം ശ്രദ്ധിക്കപ്പെട്ടിരുന്നു. 1990ലാണ് അദ്ദേഹം ഇന്ത്യയുടെ പത്താമത്തെ മുഖ്യ തെരഞ്ഞെടുപ്പ് കമ്മീഷണറായി ചുമതല ഏറ്റെടുത്തത്. 1996 വരെ ആ സ്ഥാനത്ത് സേവനമനുഷ്ഠിച്ചു. തിരഞ്ഞെടുപ്പുകള് അഴിമതി രഹിതമാക്കിയതിന് പുറമെ ദേശീയ അവെയര്നെസ് ക്യാംപെയിനും ടി.എന് ശേഷന് സംഘടിപ്പിച്ചതും വന് ജനശ്രദ്ധ ആകര്ഷിച്ചിരുന്നു.
മികച്ച പ്രവര്ത്തനങ്ങളിലൂടെയും നിലപാടുകളിലൂടെയും ഒരു മുഖ്യ തെരഞ്ഞെടുപ്പ് കമ്മീഷണറുടെ ചുമതല എന്തെന്ന് ജനങ്ങളെ ബോധ്യപ്പെടുത്താനും ടി.എന് ശേഷന് കഴിഞ്ഞിരുന്നു. ഫോട്ടോ പതിച്ച തിരിച്ചറിയല് കാര്ഡ്, സ്ഥാനാര്ത്ഥികളുടെ വരുമാന വിവരം വെളിപ്പെടുത്തുക എന്നിങ്ങനെ നിരവധി വിപ്ലവാത്മകമായ മാറ്റങ്ങള് ശേഷന് തെരഞ്ഞെടുപ്പ് രംഗത്തേക്ക് കൊണ്ടുവന്നിരുന്നു. 1932ല് പാലക്കാട് ജില്ലയിലെ തിരുന്നെല്ലായിലായിരുന്നു ജനനം. ബേസല് ഇവാഞ്ചലിക്കല് മിഷന് ഹയര് സെക്കണ്ടറി സ്കൂള്, പാലക്കാട് വിക്ടോറിയ കോളേജ്, മദ്രാസ് ക്രിസ്ത്യന് കോളേജ്, എന്നിവിടങ്ങളിലായിരുന്നു വിദ്യാഭ്യാസം. 1955 ബാച്ചിലെ ഐ.എ.എസ് ഉദ്യോഗസ്ഥനായിരുന്നു.
Discussion about this post