തിരുവനന്തപുരം: ശ്രീരാമദാസമിഷന്റെ അധീനതയിലുള്ള ചേങ്കോട്ടുകോണം ശ്രീനീലകണ്ഠവിദ്യാപീഠം ശിശുദിനത്തോടനുബന്ധിച്ച് വര്ണ്ണശബളമായ റാലിയും ഇന്റര് സ്കൂള് ക്വിസ് മത്സരവും സംഘടിപ്പിച്ചു. ചേങ്കോട്ടുകോണം ശ്രീരാമദാസ ആശ്രമത്തിനു മുന്നില് നിന്നാരംഭിച്ച ശിശുദിന റാലി തിരുവനന്തപുരം കോര്പ്പറേഷന് കൗണ്സിലര് പ്രദീപ് കുമാര് ഫ്ളാഗ് ഓഫ് ചെയ്തു. പ്രിന്സിപ്പല് ആര്.ശ്രീരേഖയുടെ നേതൃത്വത്തില് നടന്ന റാലിയില് കുട്ടികളും അധ്യാപകരും പിറ്റി.എ ഭാരവാഹികളും പങ്കെടുത്തു. ഭാരതാംബയുടെയും രാജ്യത്തെ വസ്ത്രധാരണ വൈവിധ്യം പ്രകടമാക്കുന്ന വേഷം ധരിച്ചകുട്ടികള് റാലിയില് ശ്രദ്ധേയമായി. കൂടാതെ കുട്ടികളുടെ കായിക-കലാപ്രകടനങ്ങളും റാലിയുടെ മാറ്റുകൂട്ടി.
ശിശു ദിനത്തില് വിവിധ സ്കൂളുകളെ പങ്കെടുപ്പിച്ചു കൊണ്ട് ഭാരതചരിത്രത്തെ ആസ്പദമാക്കി നടന്ന ഇന്റര് സ്കൂള് ക്വിസ് മത്സരം ‘ബിഗ് ബ്രയിന്’ സംഘടിപ്പിച്ചു. കേരള കൗമുദി സീനിയര് ന്യൂസ് എഡിറ്റര് എം.സത്യജിത് ക്വിസ് മാസ്റ്ററായിരുന്ന മത്സരത്തില് ജ്യോതി നിലയം ഹയര് സെക്കന്ഡറി സ്കൂള്, സെന്റ് ആന്ട്രൂസ് ഒന്നാം സ്ഥാനമായ ‘ബിഗ് ബ്രയിന്’കരസ്ഥമാക്കി. രണ്ടാം സ്ഥാനമായ’ സൂപ്പര് ജീനിയസ് ‘എം.ജി.എം സെന്ട്രല് സ്കൂള്, ആക്കുളവും മൂന്നാം സ്ഥാനമായ ‘ജീനിയസ്’ എല്.വി.എച്ച്.എസ് പോത്തന്കോടും കരസ്ഥമാക്കി. പങ്കെടുത്ത എല്ലാ സ്കൂളുകള്ക്കും സര്ട്ടിഫിക്കറ്റുകള് വിതരണം ചെയ്തു. വിജയികള്ക്ക് പ്രിന്സിപ്പലും ക്വിസ് മാസ്റ്ററും സമ്മാനങ്ങള് വിതരണം ചെയ്തു.
Discussion about this post