തിരുവനന്തപുരം: അനന്തപുരിയില് ചിന്മയമിഷന് പ്രവര്ത്തനം ആരംഭിച്ചതിന്റെ 60-ാം വാര്ഷിക ആഘോഷമായ ‘ചിന്മയ സൗരഭം 60’ നവംബര് 13 മുതല് 18 വരെ തൈക്കാട് പോലീസ് ഗ്രൗണ്ടില് നടന്നു. ഇതിന്റെ ഭാഗമായി വിവിധ ആശ്രമങ്ങളില് നിന്നുള്ള സന്യാസി ശ്രേഷ്ഠന്മാരെ ആദരിക്കുന്ന ചടങ്ങായ മഹാ യതിപൂജ നടന്നു. കേരള ചിന്മയമിഷന് മേധാവി സ്വാമി വിവിക്താനന്ദജി മഹാരാജ് അദ്ധ്യക്ഷനായിരുന്ന സന്യാസി സമ്മേളനത്തില് ചേങ്കോട്ടുകോണം ശ്രീരാമദാസ ആശ്രമം അദ്ധ്യക്ഷന് സ്വാമി ബ്രഹ്മപാദാനന്ദ സരസ്വതി തൃപ്പാദങ്ങള് അനുഗ്രഹപ്രഭാഷണം നടത്തി. വിവിധ ആശ്രമങ്ങളില് നിന്നുള്ള സന്യാസിമാര് സമ്മേളനത്തില് സംസാരിച്ചു.
ആറ് ദിവസങ്ങളിലായി നടന്ന പരിപാടിയുടെ ഭാഗമായി 1000 പേരുടെ നാരായണീയ പാരായണം, ഹിന്ദുമഹാസമ്മേളനം, അയ്യപ്പഭക്തജന സംഗമം, സനാതനധര്മ്മ പ്രഭാഷണ പരമ്പര, 500 പേരുടെ ഗായത്രി ഹവനം തുടങ്ങിയ വിവിധ പരിപാടികള് വേറിട്ട അനുഭവമായിരുന്നു. ഇതിന് പുറമെ, വിവിധ കലാ സാംസ്കാരിക പരിപാടികളും, വിവിധ ഹൈന്ദവ സംഘടനകളുടെ സ്റ്റാളുകളും ആദ്ധ്യാത്മിക പുസ്തക പ്രകാശനവും ‘ചിന്മയ സൗരഭം 60’ന്റെ ഭാഗമായുണ്ട്. തിരുവനന്തപുരം ചിന്മയമിഷന് ആചാര്യന് സ്വാമി അഭയാനന്ദജി പരിപാടികള്ക്ക് നേതൃത്വം നല്കി.
