ദില്ലി: കൊറോണ വൈറസ് ബാധയുടെ പശ്ചാത്തലത്തില് ചൈനയില് കുടുങ്ങിപ്പോയ ആളുകളെ ഒഴിപ്പിക്കാന് എല്ലാ സഹായവും ചെയ്യുമെന്ന് ചൈനീസ് ഭരണകൂടം. ഇന്ത്യയടക്കമുള്ള രാജ്യങ്ങള് ആളുകളെ ഒഴിപ്പിക്കാന് തയ്യാറെടുത്ത് നില്ക്കുകയാണെന്നും ചൈന അറിയിച്ചു. ഇന്ത്യയെക്കൂടാതെ അമേരിക്ക, ഫ്രാന്സ്, ജപ്പാന്, സൗത്ത് കൊറിയ എന്നീ രാജ്യങ്ങളും വിമാനം തയ്യാറാക്കി കാത്തിരിക്കുകയാണ്.
കഴിഞ്ഞ രണ്ട് ദിവസമായി ഇന്ത്യക്കാരെ തിരികെയെത്തിക്കാന് വേണ്ടി ചര്ച്ചകള് നടക്കുകയാണ്. വുഹാനിലുള്ള ഇന്ത്യയിലേക്ക് മടങ്ങേണ്ട എല്ലാ ഇന്ത്യക്കാര്ക്കും ഇന്ത്യന് എംബസി സമ്മത പത്രം കൈമാറിയിട്ടുണ്ടെന്നാണ് വിവരം. തിരികെയെത്തിയാല് 14 ദിവസം നിരീക്ഷണത്തില് കഴിയേണ്ടി വരുമെന്നതടക്കമുള്ള നിര്ദ്ദേശങ്ങളടങ്ങിയ സമ്മത പത്രമാണ് ഇന്ത്യക്കാര്ക്ക് കൈമാറിയിട്ടുള്ളത്.
ഇന്ത്യയുടെ കണക്ക് പ്രകാരം 250ലേറെ ആളുകള് ചൈനയില് കുടുങ്ങിക്കിടക്കുന്നുണ്ട്. ഇതില് മലയാളികളുമുണ്ട്. ഇവരില് നല്ല ഒരു പങ്കും വിദ്യാര്ത്ഥികളാണ്. ചൈനയിലേക്ക് പോകാന് വേണ്ടി എയര്ഇന്ത്യ വിമാനം മുംബൈയില് സജ്ജമാക്കി വച്ചിട്ടുണ്ടെങ്കിലും അങ്ങോട്ട് പോകുവാന് എപ്പോള് കഴിയുമെന്ന കാര്യത്തില് സ്ഥിരീകരണമുണ്ടായിട്ടില്ല.
വുഹാനില് നിന്ന് ഇന്ത്യക്കാരെ ഒഴിപ്പിക്കുന്നതിന് ചൈന ആദ്യം സമ്മതംമൂളിയിരുന്നില്ല. കേന്ദ്രസര്ക്കാര് തുടര്ച്ചയായി നടത്തിയ ചര്ച്ചകള്ക്ക് ഒടുവിലാണ് നിലപാടില് അയവുണ്ടായത്. പകര്ച്ചവ്യാധി മേഖലയില് നിന്ന് മറ്റൊരു സ്ഥലത്തേക്ക് ആളുകളെ കൂട്ടത്തോടെ മാറ്റുന്നത് ഗുരുതരമായ പ്രത്യാഘാതങ്ങളുണ്ടാക്കുമെന്ന ലോകാരോഗ്യ സംഘടനയുടെ നിലപാട് ചൂണ്ടികാട്ടിയാണ് ചൈന ആദ്യം തടസ്സം പറഞ്ഞത്.
ചൈനയില് കൊറൊണ വൈറസ് ബാധമൂലം 170 പേര് മരിച്ചുവെന്നാണ് ഔദ്യോഗിക സ്ഥിരീകരണം. ഇന്നലെ മാത്രം 38 പേര് മരിച്ചുവെന്നാണ് റിപ്പോര്ട്ട്. ആയിരം പേര്ക്ക് കൂടി പുതുതായി വൈറസ് ബാധ കണ്ടെത്തിയിട്ടുണ്ട്. ഹോങ്കോങ്ങിന് പിന്നാലെ ടിബറ്റിലും വൈറസ് ബാധ സ്ഥിരീകരിച്ചിട്ടുണ്ട്. സ്ഥിതിഗതികള് വിലയിരുത്താന് ലോകാരോഗ്യസംഘടനയുടെ വിദഗ്ധസംഘം ചൈനയിലെത്തും.
ചൈനയെ കൂടാതെ 20 രാജ്യങ്ങളില് കൊറോണ വൈറസിന്റെ സാന്നിധ്യം സ്ഥിരീകരിച്ചിട്ടുണ്ട്. ടിബറ്റിലാണ് ഏറ്റവും ഒടുവിലായി വൈറസ് ബാധ സ്ഥിരീകരിച്ചത്. ജപ്പാന് ചൈനയില് നിന്നൊഴിപ്പിച്ച 200 പേരില് 3 പേര്ക്ക് വൈറസ് ബാധയുള്ളതായി കണ്ടെത്തി. അമേരിക്ക ചൈനയില് നിന്നൊഴിപ്പിച്ച 200 പേരില് വൈറസ് ബാധ ഉണ്ടോയെന്നറിയാനുള്ള പരിശോധനകള് തുടരുകയാണ്.
വുഹാനുള്പ്പെടെ 20 നഗരങ്ങളില് യാത്ര വിലക്ക് തുടരുകയാണ്. ആഗോള അടിയന്തരാവസ്ഥ പ്രഖ്യാപിക്കുന്ന കാര്യത്തില് ലോകാരോഗ്യ സംഘടന ഇന്ന് തീരുമാനമെടുക്കും. വൈറസ് ബാധ തടയാന് ലോകരാജ്യങ്ങള് അതീവജാഗ്രത പാലിക്കണമെന്ന് ലോകാരോഗ്യസംഘടന മുന്നറിയിപ്പ് നല്കിയിട്ടുണ്ട്. ഇതിനിടെ വൈറസിനെതിരായ വാക്സിന് കണ്ടുപിടിക്കുന്നതിനായി ചൈന റഷ്യയുടെ സഹായം തേടിയിട്ടുണ്ട്. കൊറോണ വൈറസിന്റെ ജനിതക ഘടന ഇതിനായി ചൈന റഷ്യക്ക് കൈമാറിക്കഴിഞ്ഞു.
Discussion about this post