ദില്ലി: രാജ്യത്ത് ആദ്യമായി കൊറോണ ബാധ സ്ഥിരീകരിച്ചത് മലയാളി വിദ്യാര്ത്ഥിക്കാണെന്ന് കേന്ദ്രസര്ക്കാര്. ചൈനയില് നിന്ന് തിരികെയെത്തിയ മലയാളി മെഡിക്കല് വിദ്യാര്ത്ഥിക്കാണ് കൊറോണ ബാധ സ്ഥിരീകരിച്ചിരിക്കുന്നത്. വുഹാന് സര്വകലാശാലയില് പഠിക്കുന്ന വിദ്യാര്ത്ഥിക്കാണ് കൊറോണ ബാധ സ്ഥിരീകരിച്ചിരിക്കുന്നതെന്നാണ് വാര്ത്താ ഏജന്സിയായ എഎന്ഐ റിപ്പോര്ട്ട് ചെയ്യുന്നത്. ഇത് കേന്ദ്രസര്ക്കാര് സ്ഥിരീകരിച്ചിട്ടുമുണ്ട്.
കേന്ദ്രസര്ക്കാര് തന്നെ ഇക്കാര്യം സ്ഥിരീകരിച്ച സാഹചര്യത്തില് ആരോഗ്യമന്ത്രി കെ കെ ശൈലജ തിരുവനന്തപുരത്ത് ഉന്നതതല യോഗം വിളിച്ചു. ഉന്നത ഉദ്യോഗസ്ഥരടക്കം യോഗത്തില് പങ്കെടുക്കും. മൂന്ന് മണിയോടെ ആരോഗ്യമന്ത്രി വാര്ത്താസമ്മേളനവും വിളിച്ചിട്ടുണ്ട്. കൂടുതല് വിവരങ്ങള് ഈ വാര്ത്താ സമ്മേളനത്തില് വിശദീകരിക്കും എന്നാണ് പ്രതീക്ഷ. ആരോഗ്യമന്ത്രി അല്പസമയത്തിനകം മുഖ്യമന്ത്രിയുമായി കൂടിക്കാഴ്ച നടത്തും. എന്തെല്ലാം നടപടികള് സ്വീകരിച്ചുവെന്നതിനെക്കുറിച്ചും, ഇനിയെന്ത് നടപടികളാണ് സ്വീകരിക്കാനിരിക്കുന്നത് എന്നതിനെക്കുറിച്ചും വിശദീകരിക്കും.
അതേസമയം, ഭയപ്പെടേണ്ട സാഹചര്യമില്ലെന്നും, വിദ്യാര്ത്ഥിയെ ഐസൊലേഷന് വാര്ഡിലേക്ക് മാറ്റിയിട്ടുണ്ടെന്നും സാഹചര്യങ്ങള് സൂക്ഷ്മമായി നിരീക്ഷിച്ച് വരികയാണെന്നും കേന്ദ്രസര്ക്കാര് പുറത്തിറക്കിയ വാര്ത്താക്കുറിപ്പില് പറയുന്നു. വിദ്യാര്ത്ഥിയുടെ ആരോഗ്യ നില തൃപ്തികരമാണെന്നും, കുട്ടിയെ സൂക്ഷ്മമായി നിരീക്ഷിക്കുകയാണെന്നും വാര്ത്താ ഏജന്സി വ്യക്തമാക്കുന്നു. എവിടെയാണ് വിദ്യാര്ത്ഥി ചികിത്സയിലുള്ളത് എന്നതടക്കമുള്ള വിവരങ്ങള് പുറത്തുവിട്ടിട്ടില്ല.
Discussion about this post