കൊല്ലം: കൊല്ലം പള്ളിമണ് ഇളവൂരില് നിന്ന് കാണാതായ ആറ് വയസുകാരി ദേവനന്ദയുടെ മൃതദേഹം കണ്ടെത്തി. കുട്ടിയുടെ വീടിനോട് ചേര്ന്നുള്ള ഇത്തിക്കരയാറ്റില് നിന്നാണ് മൃതദേഹം കണ്ടെത്തിയത്. മുങ്ങല് വിദഗ്ധരാണ് ആറ്റില് മൃതദേഹം കണ്ടെത്തിയത്. കുട്ടിയെ കാണാതായ സമയത്ത് ധരിച്ചിരുന്ന വസ്ത്രങ്ങളാണ് പുഴയില് നിന്ന് ലഭിച്ച മൃതദേഹത്തിലുള്ളത്. കമഴ്ന്ന് കിടക്കുന്ന രീതിയിലായിരുന്നു ആറ്റില് കുട്ടിയുടെ മൃതദേഹം കണ്ടെത്തിയത്. വീട്ടില് കളിക്കുന്നതിനിടെ ഇന്നലെ രാവിലെയാണ് കുട്ടിയെ കാണാതായത്.
പള്ളിമണ് ഇളവൂര് സ്വദേശികളായ പ്രദീപ് – ധന്യ ദമ്പതികളുടെ മകളാണ് കാണാതായ ദേവനന്ദ. ഇന്നലെ രാവിലെ 9.30 നും 10.30 നും ഇടയിലാണ് കുട്ടിയെ കാണാതായത്. കുട്ടിയുടെ അമ്മ ഈ സമയം തുണി അലക്കി കൊണ്ടിരിക്കുകയായിരുന്നു. സമീപപ്രദേശത്തെ ക്ഷേത്രത്തില് ഉത്സവ ചടങ്ങുകള് നടക്കുകയാണ്. ഉത്സവത്തോട് അനുബന്ധിച്ചാണ് കുട്ടി ഇന്നലെ സ്കൂളില് നിന്ന് അവധിയെടുത്തത്.
കുട്ടിയെ കാണാതായ വിവരം അറിഞ്ഞതോടെ ക്ഷേത്രകമ്മിറ്റിക്കാരും നാട്ടുകാരും ഉള്പ്പെടെയുള്ളവര് തിരച്ചില് നടത്തിയിരുന്നു. കുട്ടിയെ കണ്ടെത്താന് കഴിയാത്തതോടെ കണ്ണനല്ലൂര് പോലീസ് സ്റ്റേഷനില് വിവരം അറിയിക്കുകയായിരുന്നു. തുടര്ന്ന് പൊലീസും അഗ്നിശമന സേനാംഗങ്ങളും തിരച്ചില് നടത്തുകയായിരുന്നു. കുട്ടിയുടെ തിരോധാനത്തില് ബാലാവകാശ കമ്മീഷന് ഇന്നലെ കേസെടുത്തിരുന്നു.
Discussion about this post