ന്യൂഡല്ഹി: പ്രധാനമന്ത്രി നരേന്ദ്ര മോദിയുടെ ആഹ്വാനം ഏറ്റെടുത്തുകൊണ്ട് രാജ്യം ഒറ്റക്കെട്ടായി ഇന്ന് രാത്രി ദീപം തെളിയിക്കും. രാത്രി 9 മണി മുതല് 9 മിനിറ്റ് നേരത്തേക്ക് ദീപം തെളിയിക്കാനാണ് പ്രധാനമന്ത്രി ആഹ്വാനം ചെയ്തിരിക്കുന്നത്. കൊറോണ വൈറസിനെതിരയെുള്ള പ്രതിരോധ പ്രവര്ത്തനങ്ങള്ക്ക് ഐക്യദാര്ഢ്യം അറിയിക്കാനാണ് പ്രധാനമന്ത്രി ജനങ്ങളോട് ദീപം തെളിയിക്കാന് ആവശ്യപ്പെട്ടത്.
കൊറോണ എന്ന അന്ധകാരത്തെ നേരിടാന് എല്ലാവരും ഒറ്റക്കെട്ടായി പോരാടണമെന്ന് പ്രധാനമന്ത്രി കഴിഞ്ഞ ദിവസമാണ് ആഹ്വാനം ചെയ്തത്. ഈ അന്ധകാരത്തെ പരാജയപ്പെടുത്താന് നാലുവശത്തു നിന്നും പ്രകാശം ചൊരിയേണ്ടതുണ്ട്. ഈ പോരാട്ടത്തില് നമ്മള് ഒറ്റയ്ക്കല്ല. 130 കോടി ജനങ്ങള് ഒരുമിച്ചാണ്. വീടിന് മുന്നിലോ ബാല്ക്കണിയിലോ വിളക്ക്, മെഴുകുതിരി, ടോര്ച്ച് അല്ലെങ്കില് മൊബൈല് വെളിച്ചം ഉപയോഗിച്ച് പ്രകാശം പരത്തണം. ആരും ഒറ്റയ്ക്കല്ല എന്ന് ആ പ്രകാശത്തിന്റെ കരുത്തില് നമുക്ക് തെളിയിക്കണമെന്നും പ്രധാനമന്ത്രി പറഞ്ഞിരുന്നു.
അതേസമയം, എല്ലാവരും ഒരേസമയം ലൈറ്റുകള് ഓഫാക്കുമ്പോഴുണ്ടാകുന്ന വോള്ട്ടേജിലെ വ്യതിയാനങ്ങള് കൈകാര്യം ചെയ്യാനുള്ള ക്രമീകരണങ്ങള് ചെയ്തിട്ടുണ്ടെന്ന് കേന്ദ്ര ഊര്ജ്ജ മന്ത്രാലയം വ്യക്തമാക്കി. വീടുകളിലെ ലൈറ്റുകള് കെടുത്താന് മാത്രമെ പ്രധാന മന്ത്രി പറഞ്ഞിട്ടുള്ളു. കമ്പ്യൂട്ടറുകളും ടെലിവിഷനുകളും റഫ്രിജറേറ്ററകളും എസികളും ഓഫ് ചെയ്യുന്നതിന് ആവശ്യപ്പെട്ടിട്ടില്ലെന്നും അതിനാല് ആശങ്കപ്പെടേണ്ട സാഹചര്യമില്ലെന്നം മന്ത്രാലയം വ്യക്തമാക്കിയിട്ടുണ്ട്.
Discussion about this post