ന്യൂഡല്ഹി: നിരവധി സംസ്ഥാനങ്ങള് ആവശ്യപ്പെട്ടതിനു പിന്നാലെ കോവിഡ് പ്രതിരോധത്തിനുള്ള 21 ദിവസത്തെ ലോക്ക് ഡൗണ് നീട്ടുന്ന കാര്യം കേന്ദ്രസര്ക്കാരിന്റെ പരിഗണനയില്. മാര്ച്ച് 24ന് പ്രഖ്യാപിച്ച ലോക്ക് ഡൗണ് കാലാവധി ഏപ്രില് 14നാണ് പൂര്ത്തിയാകുന്നത്. എന്നാല്, കോവിഡ് വ്യാപനത്തില് വ്യക്തമായ കുറവ് കാണാത്തതും പുതിയ നിരവധി കേസുകള് റിപ്പോര്ട്ട് ചെയ്തു കൊണ്ടിരിക്കുന്നതുമായ സാഹചര്യത്തില് ലോക്ക് ഡൗണ് നീട്ടണമെന്നാണ് വിവിധ സംസ്ഥാനങ്ങളും ആരോഗ്യരംഗത്തെ വിദഗ്ധരും കേന്ദ്ര സര്ക്കാരിനോട് ആവശ്യപ്പെട്ടിരിക്കുന്നത്. രാജ്യത്തെ കോവിഡ് ബാധിതരുടെ എണ്ണം നാലായിരം കടക്കുകയും അടുത്ത ദിവസങ്ങളില് കൂടുതല് പോസിറ്റീവ് കേസുകള് റിപ്പോര്ട്ട് ചെയ്യുകയും ചെയ്ത സാഹചര്യത്തില് ലോക്ക് ഡൗണ് നീട്ടണമെന്ന കാഴ്ചപ്പാടാണ് പ്രധാനമന്ത്രി നരേന്ദ്ര മോദി രൂപീകരിച്ച പതിനൊന്നംഗ ഉന്നതാധികാര സമിതിക്കുമുള്ളത്. ഏപ്രില് 14നുശേഷം ലോക്ക് ഡൗണ് നിയന്ത്രണങ്ങളില് ഏതെങ്കിലും തരത്തില് ഇളവ് വരുത്തിയാല് പോലും കര്ശന നിയന്ത്രണങ്ങള് തുടരുകതന്നെ ചെയ്യുമെന്നാണ് ഈ സമിതിയുമായി ബന്ധപ്പെട്ടവര് നല്കുന്ന വിവരം. എന്നാല്, ലോക്ക് ഡൗണ് തുടരുന്ന കാര്യത്തില് സര്ക്കാര് തീരുമാനമെടുത്തിട്ടില്ലെന്നും ഊഹാപോഹങ്ങള് പ്രചരിപ്പിക്കരുതെന്നുമാണു കേന്ദ്ര ആരോഗ്യവകുപ്പ് ജോയിന്റ് സെക്രട്ടറി ലവ് അഗര്വാള് ചൊവ്വാഴ്ച ഇതു സംബന്ധിച്ച ചോദ്യത്തിനു മറുപടി നല്കിയത്. ഘട്ടംഘട്ടമായി ലോക്ക് ഡൗണ് പിന്വലിക്കുമോ എന്ന ചോദ്യവും അദ്ദേഹം നിരാകരിച്ചു. ലോക്ക് ഡൗണ് സംബന്ധിച്ച അന്തിമ തീരുമാനം ഈ ആഴ്ച അവസാനം പ്രധാനമന്ത്രി നരേന്ദ്ര മോദി പ്രഖ്യാപിക്കും. പൊതുഗതാഗതം നിയന്ത്രിക്കുമെന്നും ഇക്കാര്യം രാഷ്ട്രീയമായല്ല വിദഗ്ധരുമായി ചര്ച്ചചെയ്തു തീരുമാനിക്കുമെന്ന് പ്രധാനമന്ത്രി വ്യക്തമാക്കി.
Discussion about this post