തിരുവനന്തപുരം: കേരളത്തില് ബുധനാഴ്ച 10 പേര്ക്ക് കോവിഡ്-19 സ്ഥിരീകരിച്ചതായി ആരോഗ്യമന്ത്രി കെ.കെ. ശൈലജ അറിയിച്ചു. മലപ്പുറം ജില്ലയില് നിന്നുള്ള മൂന്ന് പേര്ക്കും, വയനാട്, പാലക്കാട് ജില്ലകളില് നിന്നുള്ള രണ്ടു പേര്ക്കും കോട്ടയം, കണ്ണൂര്, കോഴിക്കോട് ജില്ലകളില് നിന്നുള്ള ഓരോരുത്തര്ക്കുമാണ് രോഗം സ്ഥിരീകരിച്ചത്.
ഇതില് നാലു പേര് കഴിഞ്ഞ ദിവസം വിദേശത്ത് നിന്നും രണ്ടു പേര് ചെന്നൈയില് നിന്നും വന്നതാണ്. നാലു പേര്ക്ക് സമ്പര്ക്കത്തിലൂടെയാണ് രോഗം ഉണ്ടായത്. വയനാട് ജില്ലയില് നിന്നുള്ള രണ്ടു പേര്ക്ക് സമ്പര്ക്കത്തിലൂടെ രോഗമുണ്ടായത് ചെന്നൈയില് നിന്നും വന്ന ട്രക്ക് ഡ്രൈവറിലൂടെയാണ്. മലപ്പുറം ജില്ലയില് നിന്നുള്ള ഒരാളും കണ്ണൂര് ജില്ലയില് നിന്നുള്ള ഒരാളും വയനാടില് ഡ്യൂട്ടിയിലുണ്ടായിരുന്ന പോലീസുകാരാണ്. ഇവര്ക്കും ട്രക്ക് ഡ്രൈവറിലൂടെയാണ് രോഗമുണ്ടായത്. ഇതോടെ ഈ ട്രക്ക് ഡ്രൈവറില് നിന്നും 10 പേര്ക്കാണ് രോഗം പടര്ന്നത്. അതേസമയം കൊല്ലം ജില്ലയില് ചികിത്സയിലായിരുന്ന ഒരാളുടെ പരിശോധനാഫലം നെഗറ്റീവ് ആയിട്ടുണ്ട്.
490 പേരാണ് ഇതുവരെ കോവിഡില് നിന്നും മുക്തി നേടിയത്. 41 പേരാണ് നിലവില് സംസ്ഥാനത്തെ വിവിധ ആശുപത്രികളില് ചികിത്സയിലുള്ളത്. സംസ്ഥാനത്തെ വിവിധ ജില്ലകളിലായി 34,447 പേര് നിരീക്ഷണത്തിലാണ്. ഇവരില് 33,953 പേര് വീടുകളിലും, 494 പേര് ആശുപത്രികളിലും നിരീക്ഷണത്തിലാണ്. 168 പേരെയാണ് ഇന്ന് ആശുപത്രിയില് പ്രവേശിപ്പിച്ചത്. ഇതുവരെ 39,380 വ്യക്തികളുടെ (ഓഗ്മെന്റഡ് സാമ്പിള് ഉള്പ്പെടെ) സാമ്പിള് പരിശോധനയ്ക്ക് അയച്ചിട്ടുണ്ട്. ഇതില് ലഭ്യമായ 38,509 സാമ്പിളുകളുടെ പരിശോധനാഫലം നെഗറ്റിവ് ആണ്. ഇതുകൂടാതെ സെന്റിനല് സര്വൈലന്സിന്റെ ഭാഗമായി ആരോഗ്യ പ്രവര്ത്തകര്, അതിഥി തൊഴിലാളികള്, സാമൂഹിക സമ്പര്ക്കം കൂടുതലുള്ള വ്യക്തികള് മുതലായ മുന്ഗണനാ ഗ്രൂപ്പുകളില് നിന്ന് 4268 സാമ്പിളുകള് ശേഖരിച്ചതില് 4065 സാമ്പിളുകള് നെഗറ്റീവ് ആയി. സംസ്ഥാനത്ത് ബുധനാഴ്ച പുതിയ ഹോട്ട് സ്പോട്ടില്ല. നിലവില് ആകെ 34 ഹോട്ട് സ്പോട്ടുകളാണ് ഉള്ളത്.
Discussion about this post