ന്യൂഡല്ഹി: അയോധ്യയില് രാമക്ഷേത്രനിര്മാണത്തിനു തുടക്കം കുറിക്കുന്ന ഭൂമിപൂജയ്ക്ക് ഒരുക്കങ്ങള് പൂര്ത്തിയായി. 12.30 ന് പ്രധാനമന്ത്രി നരേന്ദ്രമോദി പുണ്യശില സ്ഥാപിച്ച് ക്ഷേത്രനിര്മാണത്തിനു തുടക്കം കുറിക്കും. ഭക്തിനിര്ഭരമായ അന്തരീക്ഷമാണെങ്കിലും ക്ഷേത്രനഗരത്തില് കനത്ത സുരക്ഷ ഏര്പ്പെടുത്തിയിരിക്കുന്നത്. കോവിഡ് പ്രോട്ടോക്കോള് പാലിച്ചായിരിക്കും ചടങ്ങുകളെന്ന് സംഘാടകര് അറിയിച്ചു.
മുഖ്യമന്ത്രി യോഗി ആദിത്യനാഥ് അയോധ്യയിലെത്തി ഒരുക്കങ്ങള് വിലയിരുത്തി. ഹനുമാന് ഗഡി മുതല് രാമക്ഷേത്രം വരെയുള്ള വഴിയില് താമസിക്കുന്നവര്ക്കെല്ലാം പ്രത്യേക പാസ് നല്കി. പുറത്തു നിന്നുള്ളവരില് ക്ഷണിക്കപ്പെട്ടവര്ക്കു മാത്രമേ പ്രവേശനമുള്ളൂ.
135 സന്യാസിവര്യന്മാരടക്കം 250 പേര് ചടങ്ങില് പങ്കെടുക്കുമെന്നാണ് കരുതുന്നതെന്ന് ക്ഷേത്രനിര്മാണ ട്രസ്റ്റ് ജനറല് സെക്രട്ടറി ചംപത് റായ് അറിയിച്ചു. 11.30 ന് എത്തുന്ന പ്രധാനമന്ത്രി ഹനുമാന്ഗഡി ക്ഷേത്രത്തില് പൂജ നടത്തിയ ശേഷമായിരിക്കും രാമജന്മഭൂമിയിലെത്തുക. 12.30 ന് ആരംഭിക്കുന്ന ചടങ്ങുകള് 2 മണിവരെ നീണ്ടേക്കും. അയോധ്യയുടെ വികസന പാക്കേജ് പ്രധാനമന്ത്രി പ്രഖ്യാപിക്കും.
ഭൂമി പൂജയ്ക്കു മുന്നോടിയായുള്ള കര്മങ്ങള് ഇന്നലെ ആരംഭിച്ചു. ഗൗരി ഗണേശ പൂജ നടന്നു. ഇന്നു രാമപൂജ നടക്കും. വാരാണസി, പ്രയാഗ് രാജ്, അയോധ്യ എന്നിവിടങ്ങളിലെ വിവിധ ക്ഷേത്രങ്ങളില് നിന്നുള്ള 21 പൂജാരിമാരാണ് കാര്മികത്വം വഹിക്കുന്നത്.
താല്ക്കാലികമായ ശ്രീകോവിലില് പ്രതിഷ്ഠിച്ചിരിക്കുന്ന രാംലല്ല വിഗ്രഹത്തില് കോടി വസ്ത്രം ചാര്ത്തിയാണു പൂജ നടക്കുക. ഭൂമി പൂജയ്ക്കായി നവരത്നങ്ങള് പതിച്ച പച്ച വസ്ത്രം ചാര്ത്തും.
Discussion about this post