ന്യൂഡല്‍ഹി: കോവിഡിന്റെ പേരില്‍ ആരാധനാലയങ്ങള്‍ക്കു മാത്രം കടുത്ത നിയന്ത്രണങ്ങള്‍ ഏര്‍പ്പെടുത്തുന്നതിനെ വിമര്‍ശിച്ച് സുപ്രീംകോടതി. സാന്പത്തിക കാര്യമാണെങ്കില്‍ സാഹസത്തിനു തയാറാകുമെന്നും മതകാര്യമാണെങ്കില്‍ അതു പറ്റില്ലെന്നുമാണ് സര്‍ക്കാരിന്റെ നിലപാടെന്നു ചീഫ് ജസ്റ്റീസ് എസ്.എ. ബോബ്‌ഡെ അധ്യക്ഷനായ ബെഞ്ച് വാക്കാല്‍ വിമര്‍ശിച്ചു. മഹാരാഷ്ട്രയിലെ മൂന്ന് ജൈന ക്ഷേത്രങ്ങളില്‍ ആരാധന നടത്താന്‍ അനുമതി തേടിയുള്ള ഹര്‍ജിയില്‍ വാദം കേള്‍ക്കുകയായിരുന്നു കോടതി. സാന്പത്തിക താത്പര്യമുള്ള കാര്യങ്ങളില്‍ ഇളവുകള്‍ അനുവദിക്കുന്നു. ഇക്കാര്യത്തില്‍ എന്തു റിസ്‌കും ഏറ്റെടുക്കാന്‍ തയാറാണെന്നാണ് നിലപാട്. എന്നാല്‍, മതകാര്യമാണെങ്കില്‍ കോവിഡ് നിയന്ത്രണമുണ്ട് എന്നു പറഞ്ഞ് അനുമതി നിഷേധിക്കുന്നു- സര്‍ക്കാരിനെ വിമര്‍ശിച്ചു കൊണ്ട് ചീഫ് ജസ്റ്റീസ്, ജസ്റ്റീസുമാരായ എ.എസ്. ബൊപ്പണ്ണ, വി. രാമസുബ്രഹ്മണ്യന്‍ എന്നിവരുടെ ബെഞ്ച് നിരീക്ഷിച്ചു.
Discussion about this post