ന്യൂഡല്ഹി: മുന് രാഷ്ട്രപതി പ്രണബ് മുഖര്ജി (85) അന്തരിച്ചു. മകന് അഭിജിത് മുഖര്ജി ട്വിറ്ററിലൂടെയാണ് വിവരം അറിയിച്ചത്. വൈകിട്ട് അഞ്ചരയോടെയാണ് അന്ത്യം. രാജ്യം ഭാരതരത്ന നല്കി ആദരിച്ച പ്രണബ് ഇന്ത്യയുടെ പതിമൂന്നാം രാഷ്ട്രപതിയായിരുന്നു. തലച്ചോറില് രക്തം കട്ട പിടിച്ചതായി കണ്ടെത്തിയതിനെ തുടര്ന്ന് ശസ്ത്രക്രിയ നടത്തിയിരുന്നു. ഇതിനു മുന്നോടിയായി നടത്തിയ പരിശോധനയില് കോവിഡ് സ്ഥിരീകരിച്ചിരുന്നു.
മുന് രാഷ്ട്രപതിയുടെ വേര്പാടുവിവരം പുറത്തുവന്നതോടെ അദ്ദേഹത്തോടുള്ള ആദരസൂചകമായി രാഷ്ട്രപതി ഭവനിലും പാര്ലമെന്റ് കെട്ടിടത്തിലും ദേശീയപതാക പകുതി താഴ്ത്തിക്കെട്ടി. സെപ്റ്റംബര് ആറു വരെ രാജ്യത്ത് ദേശീയ ദുഃഖാചരണം പ്രഖ്യാപിച്ചതായി കേന്ദ്ര ആഭ്യന്തര മന്ത്രാലയം അറിയിച്ചു. ഈ കാലയളവില് രാജ്യത്തുടനീളം ദേശീയപതാക പകുതി താഴ്ത്തിക്കെട്ടും. പ്രണബ് മുഖര്ജിയുടെ സംസ്കാരം ചൊവ്വാഴ്ച ഉച്ചയ്ക്ക് രണ്ടു മണിക്കു നടത്തുമെന്ന് കുടുംബാംഗങ്ങളെ ഉദ്ധരിച്ച് പിടിഐ റിപ്പോര്ട്ട് ചെയ്തു.
കേന്ദ്രമന്ത്രി, ആസൂത്രണ കമ്മിഷന് ഉപാധ്യക്ഷന്, രാജ്യസഭാ അധ്യക്ഷന് തുടങ്ങിയ പദവികള് വഹിച്ചിട്ടുണ്ട്. ബംഗാളില് നിന്ന് ഇന്ത്യന് രാഷ്ട്രപതിയാകുന്ന ആദ്യ വ്യക്തിയാണ്. ബജറ്റ് അവതരിപ്പിച്ച ആദ്യ ബംഗാളിയെന്ന അംഗീകാരവും അദ്ദേഹത്തിനു സ്വന്തം.
രാജ്യാന്തര നാണ്യ നിധി (ഐഎംഎഫ്), ലോക ബാങ്ക്, ഏഷ്യന് ഡവലപ്മെന്റ് ബാങ്ക്, ആഫ്രിക്കന് ഡവലപ്മെന്റ് ബാങ്ക് എന്നിവയുടെ ബോര്ഡ് ഓഫ് ഗവര്ണേഴ്സ് അംഗമായിരുന്നു (1982 1985). കോണ്ഗ്രസ് പ്രവര്ത്തക സമിതി അംഗം, എഐസിസി ട്രഷറര്, കോണ്ഗ്രസ് പാര്ലമെന്റ് കക്ഷി ട്രഷറര്, എഐസിസിയുടെ കേന്ദ്ര പാര്ലമെന്ററി ബോര്ഡ് അംഗം, എഐസിസിയുടെ ഇക്കണോമിക് അഡൈ്വസറി സെല് അധ്യക്ഷന്, എഐസിസി ജനറല് സെക്രട്ടറി തുടങ്ങിയ പദവികളും വഹിച്ചിട്ടുണ്ട്.
1977 ല് മികച്ച പാര്ലമെന്റേറിയനുള്ള പുരസ്കാരവും 2008 ല് പത്മവിഭൂഷണും ലഭിച്ചിട്ടുണ്ട്. ബിയോണ്ട് സര്വൈവല്, എമര്ജിങ് ഡൈമന്ഷന്സ് ഓഫ് ഇന്ത്യന് ഇക്കണോമി, ചാലഞ്ച് ബിഫോര് ദ് നാഷന്/സാഗ ഓഫ് സ്ട്രഗ്ള് ആന്ഡ് സാക്രിഫൈസ് തുടങ്ങി ഒട്ടേറെ പുസ്തകങ്ങള് രചിച്ചിട്ടുണ്ട്. ലോക ബാങ്കിന്റെ എമേര്ജിങ് മാര്ക്കറ്റ്സ് എന്ന പ്രസിദ്ധീകരണത്തിന്റെ ഫിനാന്സ് മിനിസ്റ്റര് ഓഫ് ദി ഇയര് ഫോര് ഏഷ്യ പുരസ്കാരം (2010). ന്യൂയോര്ക്കിലെ ‘യൂറോ മണി’ എന്ന പ്രസിദ്ധീകരണം 1984ല് ലോകത്തിലെ മികച്ച ധനമന്ത്രിമാരില് ഒരാളായി പ്രണാബിനെ തിരഞ്ഞെടുത്തു. 2007ല് പത്മവിഭൂഷണ് ബഹുമതി രാജ്യം ആദരിച്ചു. 2010 ഡിസംബറില് ദ് ബാങ്കര് എന്ന പ്രസിദ്ധീകരണം ഫിനാന്സ് മിനിസ്റ്റര് ഓഫ് ദി ഇയര് ആയി തിരഞ്ഞെടുത്തു. 2011ല് വോള്വറാംടണ് സര്വകലാശാല അദ്ദേഹത്തിന് ഡോക്ടറേറ്റ് നല്കി.
ഭാര്യ: പരേതയായ സുവ്രാ മുഖര്ജി. മക്കള്: ശര്മിഷ്ഠ മുഖര്ജി, അഭിജിത് മുഖര്ജി, ഇന്ദ്രജിത് മുഖര്ജി.
Discussion about this post