ന്യൂഡല്ഹി: സഹകരണ ബാങ്കുകളെ റിസര്വ്വ് ബാങ്കിന്റെ മേല്നോട്ടത്തില് കൊണ്ടു വരുന്നതിനായി ബാങ്കിംഗ് റെഗുലേഷന് ആക്ടില് ഭേദഗതി വരുത്തുന്നതിനുള്ള ബില്ലാണ് രാജ്യസഭ പാസാക്കിയത്. സെപ്തംബര് 16 ന് ബില്ല് ലോക്സഭ പാസാക്കിയിരുന്നു.
പി എം സി ബാങ്ക് അഴിമതിയ്ക്ക് പിന്നാലെയാണ് നിക്ഷേപകരുടെ താത്പര്യം സംരക്ഷിക്കുക എന്ന ലക്ഷ്യത്തോടെ ഇത്തരമൊരു ഭേദഗതി വരുത്താന് സര്ക്കാര് തീരുമാനിച്ചത്. ജൂണ് 26 ലെ ഓര്ഡിനന്സിന് പകരമായുള്ള ബില്ലാണ് ഇത്.
റിസര്വ്വ് ബാങ്കിന്റെ മേല്നോട്ടം ഉണ്ടാകുന്നതോടെ സഹകരണ ബാങ്കുകളുടെ പ്രൊഫഷണിലസവും ഭരണ നിര്വ്വഹണവും മെച്ചപ്പെടുമെന്നാണ് കേന്ദ്ര സര്ക്കാര് വ്യക്തമാക്കുന്നത്. നിക്ഷേപകരുടെ താത്പര്യം പൂര്ണ്ണമായും സംരക്ഷിക്കുന്നതിനാണ് ഭേദഗതികള് കൊണ്ടു വന്നതെന്ന് ധനമന്ത്രി നിര്മ്മലാ സീതാരാമന് രാജ്യസഭയില് വിശദീകരിച്ചു.
ബാങ്കിംഗ് പ്രവര്ത്തനങ്ങളില് ഏര്പ്പെട്ടിരിക്കുന്ന സഹകരണ സംഘങ്ങള്ക്ക് മാത്രമാണ് ഭേദഗതിയെന്നും ധനമന്ത്രി പറഞ്ഞു. കൊറോണ വൈറസ് വ്യാപനത്തിന്റെ പശ്ചാത്തലത്തില് രാജ്യത്തെ നിരവധി സഹകരണ ബാങ്കുകള് പ്രതിസന്ധിയിലാണ്. ഇവയുടെ ധനസ്ഥിതി റിസര്വ്വ് ബാങ്ക് നിരീക്ഷിച്ചു വരികയാണെന്നും നിര്മ്മലാ സീതാരാമന് അറിയിച്ചു.
