മുംബൈ: അതിര്ത്തിയില് ഇന്ത്യ- ചൈനാ സംഘര്ഷം തുടരുന്നതിനിടെ 43 ചൈനീസ് ആപ്പുകള്ക്കുകൂടി നിരോധനമേര്പ്പെടുത്തി കേന്ദ്ര സര്ക്കാര്. രാജ്യസുരക്ഷയെയും പരമാധികാരത്തെയും ദോഷകരമായി ബാധിക്കുന്നവയാണെന്നു ചൂണ്ടിക്കാട്ടി ഐടി ആക്ട് 69 എ പ്രകാരമാണു നിരോധനം. ആഭ്യന്തര മന്ത്രാലയത്തിനു കീഴിലുള്ള ഇന്ത്യന് സൈബര് ക്രൈം കോ-ഓര്ഡിനേഷന് സെന്റര് സമര്പ്പിച്ച റിപ്പോര്ട്ടിന്റെ അടിസ്ഥാനത്തിലാണ് നടപടിയെന്നും കേന്ദ്ര ഐടി മന്ത്രാലയം അറിയിച്ചു. ടിക് ടോക്കിന്റെ പകരക്കാരനായി തിളങ്ങിയിരുന്നു സ്നാക് വീഡിയോ, ആലിബാബ ഗ്രൂപ്പിന്റെ ഷോപ്പിംഗ് പ്ലാറ്റ് ഫോം ആയ ആലി എക്സ്പ്രസ് തുടങ്ങിയ ആപ്പുകള് നിരോധിക്കപ്പെട്ടവയില് ഉള്പ്പെടുന്നു. 15 ഡേറ്റിംഗ് ആപ്പുകളും നിരോധിക്കപ്പെട്ടവയിലുണ്ട്. സുരക്ഷാ പ്രശ്നം ചൂണ്ടിക്കാട്ടി ജൂണ് 28ന് 59 ചൈനീസ് ആപ്പുകള്ക്കും സെപ്റ്റംബറില് 118 ആപ്പുകള്ക്കും കേന്ദ്രസര്ക്കാര് നിരോധനമേര്പ്പെടുത്തിയിരുന്നു. പബ്ജി മൊബൈല്, പബ്ജി മൊബൈല് ലൈറ്റ്, ടിക് ടോക്ക്, ബെയ്ദു തുടങ്ങിയവയാണ് അക്കൂട്ടത്തില് പുറത്തായ വമ്പന്മാര്.
Discussion about this post