ന്യൂഡല്‍ഹി: രാജ്യത്തെ എല്ലാ വാഹനങ്ങള്‍ക്കും ഏകീകൃത പുക മലിനീകരണ നിയന്ത്രണ സര്‍ട്ടിഫിക്കറ്റ് (പിയുസി) കൊണ്ടുവരാന്‍ ആലോചിക്കുന്നതായി കേന്ദ്ര ഗതാഗത മന്ത്രാലയം. പ്രധാന വിവരങ്ങള്‍ അടങ്ങിയ ക്യുആര്‍ കോഡും വാഹനങ്ങള്‍ക്കായി രൂപപ്പെടുത്തുമെന്നും സൂചനയുണ്ട്.
മോട്ടോര്‍ വെഹിക്കിള്‍ നിയമത്തില്‍ കാതലായ മാറ്റങ്ങള്‍ കൊണ്ടുവരാനാണ് കേന്ദ്ര തീരുമാനം. ഇത് സംബന്ധിച്ച് അഭിപ്രായങ്ങളും നിര്‍ദേശങ്ങളും അറിയിക്കാമെന്നും കേന്ദ്ര ഗതാഗത മന്ത്രാലയം വ്യക്തമാക്കി. പിയുസി ഡേറ്റ ബേസും ദേശീയ രജിസ്റ്ററും ബന്ധിപ്പിച്ച് വാഹന ഉടമകള്‍ക്ക് എസ്.എം.എസ് വഴി വിവരങ്ങള്‍ ലഭ്യമാക്കാനുള്ള സംവിധാനവും ആലോചനയിലുണ്ട്.
ഇതിന് പുറമേ ഉടമയ്ക്ക് എന്തെങ്കിലും സംഭവിച്ചാല്‍ വാഹനം നോമിനിയുടെ പേരിലേക്കു മാറ്റാം. നോമിനി, ഉടമാവകാശം, രേഖകളുടെ അടിസ്ഥാനത്തില്‍ നോമിനിയെ നിര്‍ദേശിക്കുന്നത് എന്നിവയുമായി ബന്ധപ്പെട്ട മോട്ടര്‍ വാഹന നിയമത്തിലെ 47, 55, 56 വ്യവസ്ഥകളിലാണു ഭേദഗതി വരുത്താനൊരുങ്ങുന്നത്.
Discussion about this post