മോസ്‌കോ: റഷ്യയില്‍ കോവിഡിനെതിരേ വാക്‌സിനേഷന്‍ ആരംഭിച്ചു. തദ്ദേശീയമായി വികസിപ്പിച്ച സ്പുട്‌നിക്-5 വാക്‌സിനാണ് മോസ്‌കോ നഗരവാസികള്‍ക്കു കുത്തിവയ്ക്കുന്നത്. ആരോഗ്യ, സാമൂഹ്യ, വിദ്യാഭ്യാസ മേഖലകളില്‍ പ്രവര്‍ത്തിക്കുന്നവര്‍ക്കാണ് ആദ്യഘട്ടത്തില്‍ വാക്‌സിന്‍ നല്കുന്നത്.
സ്പുട്‌നിക് വാക്‌സിന്‍ 95 ശതമാനം ഫലപ്രദമാണെന്ന് റഷ്യന്‍ വൃത്തങ്ങള്‍ അവകാശപ്പെടുന്നു. പാര്‍ശ്വഫലങ്ങളില്ലെന്നും പറയുന്നു. അതേസമയം, ഈ വാക്‌സിന്റെ ക്ലിനിക്കല്‍ പരീക്ഷണം ഇതുവരെ പൂര്‍ത്തിയായിട്ടില്ല. രണ്ടു ഘട്ടമായിട്ടാണ് വാക്‌സിന്‍ സ്വീകരിക്കേണ്ടത്. രണ്ടാമത്തെ കുത്തിവയ്പ് 21 ദിവസങ്ങള്‍ക്കുശേഷം എടുക്കണം.
മോസ്‌കോ നഗരത്തില്‍ 70 വാക്‌സിനേഷന്‍ കേന്ദ്രങ്ങള്‍ ഒരുക്കിയിട്ടുണ്ട്. ഓണ്‍ലൈനായി മുന്‍കൂര്‍ രജിസ്റ്റര്‍ ചെയ്തവര്‍ക്ക് രാവിലെ എട്ടു മുതല്‍ രാത്രി എട്ടുവരെ കേന്ദ്രങ്ങിലെത്താം.
ഗര്‍ഭിണികള്‍, മുലയൂട്ടുന്നവര്‍, ചില ഗുരുതര രോഗങ്ങളുള്ളവര്‍, രണ്ടാഴ്ചയ്ക്കിടെ ശ്വാസകോശ രോഗങ്ങള്‍ പിടിപെട്ടവര്‍ മുതലായവരെ വാക്‌സിന്‍ എടുക്കുന്നതില്‍നിന്ന് ഒഴിവാക്കിയിട്ടുണ്ട്.
കോവിഡ് വ്യാപനതീവ്രതയില്‍ ലോകത്തു നാലാം സ്ഥാനത്താണ് റഷ്യ. 24.3 ലക്ഷം പേര്‍ക്കു രോഗം പിടിപെട്ടു. 42,684 പേര്‍ മരിച്ചു. ആശുപത്രികളെല്ലാം രോഗികളെക്കൊണ്ടു നിറഞ്ഞിരിക്കുന്നു. മോസ്‌കോയിലാണ് ഏറ്റവും ഗുരുതരാവസ്ഥ. വാക്‌സിന്‍ ലഭ്യമാകുന്നതിനനുസരിച്ച് കൂടുതല്‍ പേര്‍ക്കു കുത്തിവയ്പ്പു നല്കാനാണ് ഉദ്ദേശിക്കുന്നത്.
വര്‍ഷാവസാനത്തോടെ 20 ലക്ഷം ഡോസുകള്‍ ഉത്പാദിപ്പിക്കാനാകുമെന്നാണ് കണക്കുകൂട്ടല്‍.
Discussion about this post