പെഷാവാര്‍: വടക്കുപടിഞ്ഞാറന്‍ പാക്കിസ്ഥാനില്‍ ഹിന്ദുക്ഷേത്രം നശിപ്പിച്ച് തീയിട്ട സംഭവത്തില്‍ 30 മുസ്ലിം ഭീകരര്‍ അറസ്റ്റില്‍. ബുധനാഴ്ച ഖൈബര്‍ പഖ്തുന്‍ഖയിലെ കരക് ജില്ലയില്‍ ടെറി ഗ്രാമത്തിലായിരുന്നു സംഭവം.
ക്ഷേത്രം പുനര്‍നിര്‍മിക്കാന്‍ പ്രവിശ്യാ സര്‍ക്കാര്‍ ഉത്തരവിട്ടു. പുരാതന ക്ഷേത്രം പുനര്‍നിര്‍മിക്കാന്‍ പ്രാദേശിക ഭരണകൂടം അനുമതി നല്‍കിയതിനു പിന്നാലെയാണ് ആക്രമണം ഉണ്ടായത്. ജാമിയത്ത് ഉലമ-ഇ-ഇസ്ലാം പാര്‍ട്ടിയുടെ നേതൃത്വത്തിലുള്ള അക്രമികള്‍ ക്ഷേത്രം പൂര്‍ണമായും തകര്‍ത്തു.
സംഭവത്തില്‍ 350 ഓളം പേര്‍ക്കെതിരെ പോലീസ് കേസെടുത്തു. 30 പേരെ അറസ്റ്റ് ചെയ്തു. തീവ്രവാദ പ്രവര്‍ത്തനവുമായി ബന്ധപ്പെട്ട വകുപ്പുകളും പ്രതികള്‍ക്കെതിരെ ചുമത്തി. പ്രവിശ്യയിലെ ന്യൂനപക്ഷങ്ങളുടെ ആരാധനാലയങ്ങള്‍ക്ക് സംരക്ഷണം ഉറപ്പാക്കുമെന്നും പോലീസ് വ്യക്തമാക്കി.
