തിരുവനന്തപുരം: കോവിഡ് വാക്സിന് വിതരണം ചെയ്യുന്നതിനു സംസ്ഥാനം പൂര്ണ സജ്ജം. സംസ്ഥാനത്തെ കോവിഡ് വാക്സിന് കുത്തിവയ്പിനുള്ള ഡ്രൈ റണ് വിജയകരമായി ഇന്നലെ പൂര്ണമായി.
നാലു ജില്ലകളിലാണ് ഇന്നലെ ഡ്രൈ റണ് നടന്നത്. തിരുവനന്തപുരം ജില്ലയിലെ പൂഴനാട് പ്രാഥമികാരോഗ്യ കേന്ദ്രം, പേരൂര്ക്കട ജില്ലാ മാതൃക ആശുപത്രി, കിംസ് ആശുപത്രി, ഇടുക്കി ജില്ലയിലെ വാഴത്തോപ്പ് പ്രാഥമികാരോഗ്യ കേന്ദ്രം, പാലക്കാട് ജില്ലയിലെ നെന്മാറ സാമൂഹ്യാരോഗ്യ കേന്ദ്രം, വയനാട് ജില്ലയിലെ കുറുക്കാമൂല പ്രാഥമികാരോഗ്യ കേന്ദ്രം എന്നിവിടങ്ങളിലാണ് ഡ്രൈ റണ് നടന്നത്. രാവിലെ ഒന്പതു മുതല് 11 വരെയായിരുന്നു ഡ്രൈ റണ്. ഓരോ കേന്ദ്രത്തിലും 25 ആരോഗ്യ പ്രവര്ത്തകര് വീതമാണ് ഡ്രൈ റണ്ണില് പങ്കെടുത്തത്. വാക്സിന് രജിസ്ട്രേഷന് മുതല് ഒബ്സര്വേഷന് വരെ കോവിഡ് വാക്സിനേഷന് നല്കുന്ന നടപടിക്രമങ്ങള് എല്ലാം അതുപോലെ പാലിച്ചാണ് ഡ്രൈ റണ് നടത്തിയത്. എല്ലാ ജില്ലകളിലും ആരോഗ്യ വകുപ്പിലെ ഉന്നത ഉദ്യോഗസ്ഥര് പ്രവര്ത്തനങ്ങള് വിലയിരുത്തി. കോവിഡ് വാസ്കിനേഷനുള്ള 14 ലക്ഷം ഓട്ടോ ഡിസേബിള് ഡിസ്പോസബിള് സിറിഞ്ചുകള് ഇന്നലെ സംസ്ഥാനത്ത് എത്തിച്ചിട്ടുണ്ട്.
സംസ്ഥാനത്ത് വളരെവേഗം കോവിഡ് വാക്സിന് ലഭ്യമാക്കുമെന്നാണ് പ്രതീക്ഷയെന്ന് ആരോഗ്യ മന്ത്രി കെ.കെ. ശൈലജ പറഞ്ഞു. എന്നാല്, എന്ന് എത്തുമെന്ന് അറിയിപ്പ് ലഭിച്ചിട്ടില്ല. കോവിഷീല്ഡ് വാക്സിന് താരതമ്യേന സുരക്ഷിതമെന്നാണ് വിദഗ്ധര് പറയുന്നത്. അതുകൊണ്ടുതന്നെ വാക്സിന് എടുക്കുന്നതിന് ആര്ക്കും ആശങ്ക വേണ്ട. കേന്ദ്രസര്ക്കാരിന്റെ മാര്ഗ നിര്ദേശമനുസരിച്ച് മുന്ഗണനാ ഗ്രൂപ്പിനെ തീരുമാനിച്ചിട്ടുണ്ട്. ആ ലിസ്റ്റിലുള്ളവര്ക്കാണ് വാക്സിന് ആദ്യം നല്കുക.
പിന്നീട് വാക്സിന് കിട്ടുന്ന അളവില് മറ്റുള്ളവര്ക്കും നല്കും. വാക്സിന് കിട്ടി കഴിഞ്ഞാല് അതിന്റെ സംഭരണം, വിതരണം തുടങ്ങിയ എല്ലാ കാര്യങ്ങളിലും കുറ്റമറ്റ രീതിയില് തയാറെടുപ്പ് നടത്തിയിട്ടുണ്ടെന്നും ആരോഗ്യമന്ത്രി അറിയിച്ചു.
Discussion about this post