ശ്രീരാമനവമി രഥയാത്ര ശ്രീമൂകാംബികാക്ഷേത്രത്തില്‍ നിന്ന് നാളെ ആരംഭിക്കും

തിരുവനന്തപുരം: ശ്രീരാമദാസ മിഷന്‍ യൂണിവേഴ്സല്‍ സൊസൈറ്റിയുടെ ആഭിമുഖ്യത്തില്‍ നടക്കുന്ന ശ്രീരാമനവമി രഥയാത്ര ഏപ്രില്‍ 8ന് കൊല്ലൂര്‍ ശ്രീ മൂകാംബികാ ദേവീക്ഷേത്രസന്നിധിയില്‍നിന്ന് ആരംഭിക്കും.

ശ്രീ മൂകാംബികാദേവിയുടെ ശ്രീകോവിലില്‍നിന്ന് മുഖ്യതന്ത്രി പകര്‍ന്നു നല്‍കുന്ന ജ്യോതി ശ്രീരാമദാസാശ്രമം അദ്ധ്യക്ഷന്‍ സ്വാമി ബ്രഹ്മപാദാനന്ദസരസ്വതി തൃപ്പാദങ്ങള്‍ ശ്രീരാമരഥത്തില്‍ പ്രതിഷ്ഠിച്ചുകൊണ്ട് രഥപരിക്രമണത്തിന് തുടക്കം കുറിക്കും. ശ്രീരാമായണത്തിന്റെ ആദ്ധ്യാത്മികമായ ആന്തരികസത്ത ജനഹൃദയങ്ങളിലെത്തിക്കുക എന്ന സന്ദേശവുമായാണ് രഥയാത്ര നടത്തുന്നത്. കോവിഡ് സുരക്ഷാമാനദണ്ഡങ്ങള്‍ പൂര്‍ണമായും പാലിച്ചുകൊണ്ടായിരിക്കും രഥയാത്ര നടക്കുകയെന്ന് ശ്രീരാമദാസ മിഷന്‍ യൂണിവേഴ്സല്‍ സൊസൈറ്റി അദ്ധ്യക്ഷന്‍ എസ്.കിഷോര്‍ കുമാര്‍ അറിയിച്ചു.

ക്ഷേത്ര മാതൃകയില്‍ നിര്‍മ്മിച്ചിട്ടുള്ള ശ്രീരാമരഥത്തില്‍ പഞ്ചലോഹനിര്‍മ്മിതമായ ശ്രീരാമസീത- ആഞ്ജനേയ വിഗ്രഹം, ശ്രീരാമപാദുകം, ചൂഡാരത്നം എന്നിവയും ശ്രീരാമദാസാശ്രമ സ്ഥാപകാചാര്യന്‍ ബ്രഹ്മശ്രീ നീലകണ്ഠഗുരുപാദരുടെയും ജഗദ്ഗുരു സ്വാമി സത്യാനന്ദസരസ്വതി തൃപ്പാദങ്ങളുടെയും ഛായാചിത്രങ്ങളും നിത്യാരാധനയ്ക്കും ദര്‍ശനത്തിനുമായി ഉണ്ടാകും.

ഏപ്രില്‍ 8ന് ദക്ഷിണ കര്‍ണ്ണാടകം, 9ന് കാസര്‍ഗോഡ്-കണ്ണൂര്‍ 10ന് കണ്ണൂര്‍, കോഴിക്കോട് 11ന് മലപ്പുറം, 12ന് പാലക്കാട്-തൃശ്ശൂര്‍ 13ന് തൃശ്ശൂര്‍-എറണാകുളം, 14ന് ഇടുക്കി, 15ന് കോട്ടയം, 16ന് പത്തനംതിട്ട, 17ന് ആലപ്പുഴ, 18ന് കൊല്ലം ജില്ലയിലൂടെ പരിക്രമണം നടത്തും. അന്നുതന്നെ തിരുവനന്തപുരം ജില്ലയില്‍ പ്രവേശിച്ച് വെഞ്ഞാറമൂട് മാങ്കുളം സത്യാനന്ദ ആശ്രമത്തിലും, 19ന് നെടുമങ്ങാട് കാട്ടാക്കട, മൈലച്ചല്‍ എന്നിവിടങ്ങളിലും പരിക്രമണം നടത്തും. 20ന് കന്യാകുമാരിയിലേക്ക് പോയി തിരികെ നെയ്യാറ്റിന്‍കര വഴി ചേങ്കോട്ടുകോണം ശ്രീരാമദാസാശ്രമത്തില്‍ രഥയാത്ര സമാപിക്കും.

ശ്രീരാമനവമി ദിനമായ ഏപ്രില്‍ 21ന് ശ്രീരാമദാസ ആശ്രമത്തിലെ ജ്യോതിക്ഷേത്ര സന്നിധിയില്‍ വൈകുന്നേരം 5.30ന് ശ്രീരാമനവമി സമ്മേളനം നടക്കും. സമ്മേളനത്തില്‍ 2021-ലെ ആശ്രമബന്ധു പരസ്‌കാരം സമ്മാനിക്കുന്നതാണ്.