തൃശൂര്: തൃശൂര് പൂരത്തിനിടെ മരം മുറിഞ്ഞു വീണ് അപകടം. സംഭവത്തില് രണ്ടു പേര് മരിച്ചു. തിരുവമ്പാടി ആഘോഷ കമ്മിറ്റി അംഗം രമേശ് (56), പൂങ്കുന്നം സ്വദേശിയായ പനിയത്ത് രാധാകൃഷ്ണന് എന്നിവരാണ് മരിച്ചത്.
രാത്രി 12ന്് തിരുവമ്പാടിയുടെ മഠത്തില് വരവിനിടെയാണ് ആല്മരം കടപുഴകിയത്. 25 പേര്ക്കാണ് പരിക്കേറ്റിട്ടുള്ളത്. ഇവരെ നഗരത്തിലെ വിവിധ ആശുപത്രികളിലായി പ്രവേശിപ്പിച്ചിരിക്കുകയാണ്.
എട്ട് പേരെ മെഡിക്കല് കോളജിലേക്ക് മാറ്റിയിട്ടുണ്ട്. ഒന്നര മണിക്കൂര് സമയമെടുത്ത് ഫയര്ഫോഴ്സ് ആല്മരം മുറിച്ച് മാറ്റി. പൂരം ഡ്യൂട്ടിയിലുണ്ടായിരുന്ന അന്തിക്കാട് സി.ഐ ഉള്പ്പെടെ ഏതാനും പോലീസുകാര്ക്കും പരിക്കേറ്റിട്ടുണ്ട്.
പഞ്ചവാദ്യം നടക്കുമ്പോഴാണ് അപകടം സംഭവിച്ചത്. സംഭവസ്ഥലത്ത് പോലീസും ഫയര്ഫോഴ്സും ചേര്ന്ന് രക്ഷാപ്രവര്ത്തനം തുടരുകയാണ്.
ജില്ലാ കളക്ടറും പോലീസ് മേധാവിയും സ്ഥലത്തെത്തി. ആള്ക്കൂട്ടം കുറവായതിനാല് വലിയ ദുരന്തമാണ് ഒഴിവായത്.
