തിരുവനന്തപുരം: തെക്കുകിഴക്കന് അറബിക്കടലില് രൂപപ്പെട്ട ടൗട്ടെ ചുഴലിക്കാറ്റ് കൂടുതല് ശക്തിപ്രാപിച്ച് അതിതീവ്ര ചുഴലിക്കാറ്റായി മാറുമെന്നു കാലാവസ്ഥാ നിരീക്ഷണകേന്ദ്രത്തിന്റെ മുന്നറിയിപ്പ്.
കടല് പ്രക്ഷുബ്ധമായി തുടരുന്നതിനാല് കേരളതീരത്ത് മത്സ്യബന്ധനത്തിന് ഏര്പ്പെടുത്തിയ നിരോധനം തുടരുകയാണ്. ഇന്നും നാളെയും വിവിധ ജില്ലകളില് ഓറഞ്ച്, യെല്ലോ അലര്ട്ടുകള് പ്രഖ്യാപിച്ചു.
എറണാകുളം, ഇടുക്കി, മലപ്പുറം ജില്ലകളില് ഇന്ന് ഓറഞ്ച് അലര്ട്ടും മറ്റു ജില്ലകളില് യെല്ലോ അലര്ട്ടും പ്രഖ്യാപിച്ചു. കൊല്ലം, ആലപ്പുഴ, കോട്ടയം, എറണാകുളം, ഇടുക്കി, തൃശൂര്, മലപ്പുറം ജില്ലകളില് നാളെ യെല്ലോ അലര്ട്ടാണ്.
ചുഴലിക്കാറ്റിന്റെ സ്വാധീനം ഇന്ന് ഉച്ചവരെ കേരളത്തില് അതിശക്തമായിരിക്കും. കാസര്ഗോഡ്, കണ്ണൂര്, കോഴിക്കോട്, വയനാട്, മലപ്പുറം ജില്ലകളില് അതിശക്തമായ കാറ്റ് തുടരും.
ഇന്നലെ വൈകുന്നേരത്തോടെ അമിനി ദ്വീപ് തീരത്തുനിന്ന് ഏകദേശം 190 കിലോമീറ്റര് വടക്ക്-വടക്കു പടിഞ്ഞാറും ഗോവയിലെ പനാജി തീരത്ത് നിന്ന് 330 കിലോമീറ്റര് തെക്ക്-തെക്കുപടിഞ്ഞാറുമായി സ്ഥിതി ചെയ്തിരുന്ന ചുഴലിക്കാറ്റ് മണിക്കൂറില് 11 കിലോമീറ്റര് വേഗത്തില് വടക്ക്-വടക്ക് പടിഞ്ഞാറ് ദിശയില് സഞ്ചാരം തുടരുകയാണ്. ഇന്നു പുലര്ച്ചെയോടെ ചുഴലിക്കാറ്റ് കൂടുതല് ശക്തിപ്രാപിച്ച് അതിതീവ്ര ചുഴലിക്കാറ്റായി മാറുമെന്നും ചൊവ്വാഴ്ച വൈകുന്നേരത്തോടെ ഗുജറാത്തിലെ പോര്ബന്തര്, നലിയ തീരങ്ങള്ക്കിടയിലൂടെ കരയില് പ്രവേശിക്കുമെന്നുമാണു നിഗമനം.
