ന്യൂഡല്ഹി: ബംഗാള് ഉള്ക്കടലില് രൂപം കൊണ്ട അതിതീവ്ര ചുഴലിക്കാറ്റായ യാസ് കരതൊട്ടു. രാവിലെ പത്തിനും 11നും ഇടയില് ഒഡിഷയിലെ ഭദ്രക് ജില്ലയിലാണ് യാസ് പ്രവേശിച്ചു തുടങ്ങിയത്. ഉച്ചയോടെ യാസ് പൂര്ണമായും കരയിലേക്ക് കടക്കും.
പശ്ചിമബംഗാള്. ഒഡീഷ തീരങ്ങളില് കനത്ത കാറ്റാണ് വീശുന്നത്. ഇവിടങ്ങളില് റെഡ് അലര്ട്ട് പ്രഖ്യാപിച്ചിട്ടുണ്ട്. കരയിലേക്ക് പ്രവേശിക്കുമ്പോള് മണിക്കൂറില് പരമാവധി 130 മുതല് 140 കിലോമീറ്റര് വരെയാകും യാസിന്റെ വേഗം. ബംഗാളിലെ ഹൂഗ്ലി ജില്ലയില് വൈദ്യുതാഘാതമേറ്റ് രണ്ടു പേര് മരിച്ചതായി മുഖ്യമന്ത്രി മമത ബാനര്ജി അറിയിച്ചു.
മൂന്നു മീറ്റര് വരെ ഉയരത്തില് തിരമാലകള് ഉയരുമെന്നും മുന്നറിയിപ്പുണ്ട്. പശ്ചിമ ബംഗാള് 11.5 ലക്ഷം പേരെയും ഒഡിഷ ആറുലക്ഷം പേരെയുമാണ് സുരക്ഷിത സ്ഥാനങ്ങളിലേക്കുമാറ്റിയത്. കോല്ക്കത്ത നഗരത്തില് ഗതാഗത കുരുക്ക് രൂക്ഷമാണ്. മുന്കരുതല് നടപടിയുടെ ഭാഗമായി കൊല്ക്കത്ത വിമാനത്താവളം അടക്കുകയും ചെയ്തു.
