തിരുവനന്തപുരം: ടിപിആര് അടിസ്ഥാനത്തിലുള്ള നിലവിലെ ലോക്ഡൗണ് നിയന്ത്രണം ഒഴിവാക്കി. പകരം ആയിരത്തില് എത്ര രോഗികള് എന്നത് കണക്കിലെടുത്താവും ഇനിയുള്ള നിയന്ത്രണങ്ങള്. നിയമസഭയില് ആരോഗ്യമന്ത്രി വീണാ ജോര്ജാണ് പുതിയ മാര്ഗനിര്ദേശം പ്രഖ്യാപിച്ചത്.
ശനിയാഴ്ചത്തെ ലോക്ഡൗണ് പൂര്ണമായി ഒഴിവാക്കി. ഞായര് മാത്രം അടച്ചിടും. ഓഗസ്റ്റ് 15, ഓണത്തിന്റെ അവിട്ടം നാള് എന്നീ ഞായറാഴ്ചകളില് ലോക്ഡൗണ് ഉണ്ടാവില്ല. കടകളും വ്യാപാര സ്ഥാപനങ്ങളും ആഴ്ചയില് ആറു ദിവസവും തുറന്നു പ്രവര്ത്തിപ്പിക്കാന് അനുവദിക്കും.
രാവിലെ ഏഴു മുതല് രാത്രി ഒന്പതു വരെ കടകള് തുറക്കാനാകും. കടകളിലെ ജോലിക്കാരും സാധനം വാങ്ങാന് എത്തുന്നവരും ഒരു ഡോസ് വാക്സിന് എങ്കിലും എടുത്തവരാകുന്നതാണ് അഭികാമ്യം. അല്ലെങ്കില് ഒരു തവണയെങ്കിലും കോവിഡ് വന്നു പൂര്ണമായി ഭേദമായവരാകണം.
കല്യാണത്തിനും മരണത്തിനും 20 പേര്ക്ക് പങ്കെടുക്കാം. ആരാധനാലയങ്ങളില് പരാമവധി 40 പേര്ക്ക് സംബന്ധിക്കാമെന്നും ആരോഗ്യമന്ത്രി അറിയിച്ചു. അറുപത് വയസിനു മുകളിലുള്ളവരുടെ വാക്സിനേഷന് ഉടനെ പൂര്ത്തിയാക്കുമെന്നും മന്ത്രി കൂട്ടിച്ചേര്ത്തു.
Discussion about this post