ന്യൂഡല്ഹി: സുനന്ദ പുഷ്കറിന്റെ മരണവുമായി ബന്ധപ്പെട്ട കേസില് ശശി തരൂര് കുറ്റവിമുക്തന്. തരൂരിന് മേല് ആത്മഹത്യാ പ്രേരണാകുറ്റം നിലനില്ക്കില്ലെന്ന് ഡല്ഹി റോസ് അവന്യു കോടതി വിധിച്ചു. അഡീഷണല് സെഷന്സ് ജഡ്ജി ഗീതാംഞ്ജലി ഗോയല് ആണ് വിധി പറഞ്ഞത്. തരൂരിനെതിരെ തെളിവുകളില് ഹാജരാക്കുന്നതില് പോലീസ് പരാജയപ്പെട്ടു.
ശശി തരൂരിനെതിരെ ഐപിസി 306 ആത്മഹത്യ പ്രേരണ, 498എ ഗാര്ഹിക പീഡനം എന്നീ കുറ്റങ്ങള് ചുമത്തണമെന്നാണ് ഡല്ഹി പോലീസ് വാദിച്ചത്. എന്നാല് സുനന്ദ പുഷ്കറിന് നിരവധി അസുഖങ്ങളുണ്ടായിരുന്നെന്നും മരണം സ്വാഭാവികമാണെന്നുമായിരുന്നു ശശി തരൂരിന്റെ വാദം. ഡല്ഹി പോലീസിന്റെ പ്രത്യേക സംഘമാണ് കേസ് അന്വേഷിച്ചത്.
2014 ജനുവരി 17-നായിരുന്നു ഡല്ഹിയിലെ പഞ്ചനക്ഷത്ര ഹോട്ടല് മുറിയില് സുനന്ദയെ മരിച്ചനിലയില് കണ്ടെത്തിയത്. ആദ്യം കൊലപാതമാണെന്ന് അവകാശപ്പെട്ടെങ്കിലും തെളിവുകള് കണ്ടെത്താന് പോലീസിനായില്ല. ഒടുവില് ആത്മഹത്യപ്രേരണക്കുറ്റം ചേര്ത്ത് 2018 മേയ് 15ന് കുറ്റപത്രം സമര്പ്പിക്കുകയായിരുന്നു.
പോസ്റ്റുമോര്ട്ടം റിപ്പോര്ട്ടുകളും മറ്റ് മെഡിക്കല് റിപ്പോര്ട്ടുകളും സുനന്ദയുടെ മരണം ആത്മഹത്യയോ കൊലപാതകമോ അല്ലെന്നാണ് സൂചിപ്പിക്കുന്നത്. വര്ഷങ്ങളായി അന്വേഷിച്ചിട്ടും മരണകാരണം കണ്ടെത്താന് പ്രോസിക്യൂഷന് സാധിച്ചിരുന്നില്ല. സുനന്ദയുടേത് ആകസ്മിക മരണമായി കണക്കാക്കണമെന്നും തരൂര് വാദിച്ചത്.
സുനന്ദ ജീവനൊടുക്കുമെന്ന് ചെയ്യുമെന്ന് കരുതുന്നില്ലെന്നായിരുന്നു സഹോദരന് ആശിഷ് ദാസ് കോടതിയില് മൊഴി നല്കിയത്. മരണത്തില് തരൂരിന് പങ്കില്ലെന്ന് സുനന്ദയുടെ മകന് ശിവ് മേനോനും വ്യക്തമാക്കിയിരുന്നു.
