ഊട്ടി: സംയുക്ത സേനാ മേധാവി ബിപിന് റാവത്തും ഭാര്യയും ഉള്പ്പെടെ 13 പേര് മരണമടഞ്ഞ ഹെലികോപ്ടര് ദുരന്തത്തില് മരിച്ചവരില് മലയാളി സൈനികനും. തൃശൂര് ഒല്ലൂര് സ്വദേശി എ പ്രദീപ് ആണ് മരിച്ചത്. വ്യോമസേനയില് ജൂനിയര് വാറണ്ട് ഓഫീസറായിരുന്നു. 2004ലാണ് പ്രദീപ് വ്യോമസേനയുടെ ഭാഗമായത്. കോയമ്പത്തൂരിലെ സുലൂര് വ്യോമത്താവളത്തിലായിരുന്നു പ്രദീപ് സേവനം അനുഷ്ഠിച്ചിരുന്നത്. വെല്ലിംഗ്ടണില് ജൂനിയര് കേഡറ്റ് ഓപീസര്മാരുടെ സെമിനാറില് സംസാരിക്കുന്നതിന് വേണ്ടിയായിരുന്നു ജനറല് ബിപിന് റാവത്ത് യാത്ര തിരിച്ചത്. ഇതിനായി സുലൂര് വ്യോമത്താവളത്തില് നിന്നും അദ്ദേഹത്തെ അനുഗമിച്ച സൈനിക ഉദ്യോഗസ്ഥരില് ഒരാളായിരുന്നു പ്രദീപ്.
ഇന്ന് ഉച്ചയ്ക്ക് 12.20ഓടെയായിരുന്നു രാജ്യത്തെ നടുക്കിയ ദുരന്തം നടന്നത്. തമിഴ്നാട്ടില് ഒരു സെമിനാറിന് പങ്കെടുക്കാന് പോകുന്നതിനിടയിലാണ് വ്യോമസേനയുടെ എംഐ 17 ഹെലികോപ്ടര് തകരുന്നത്. വ്യോമസേനയാണ് സൈനിക മേധാവിയുടെ മരണം സ്ഥിരീകരിച്ചത്. ഹെലികോപ്ടറില് ഉണ്ടായിരുന്ന പതിനാല് പേരില് പതിമൂന്ന് പേരും മരണമടഞ്ഞു. ഗ്രൂപ്പ് ക്യാപ്ടന് വരുണ് സിംഗ് മാത്രമാണ് അപകടത്തില് നിന്ന് രക്ഷപ്പെട്ടത്. എന്നാല് അദ്ദേഹത്തിന്റെയും നില അതീവ ഗുരുതരമായി തുടരുകയാണ്.
കുനൂരില് നിന്ന് വെല്ലിംഗ്ടണ് കന്റോണ്മെന്റിലേക്കുള്ള യാത്രാമദ്ധ്യേ കോയമ്പത്തൂരിനും സുലൂരിനും ഇടയില് കാട്ടേരി പാര്ക്കില് ലാന്ഡിങ്ങിന് ശ്രമിക്കുമ്പോഴായിരുന്നു അപകടം. മോശം കാലാവസ്ഥയായിരുന്നു അപകടത്തിന് കാരണമായതെന്നാണ് പ്രാഥമിക വിലയിരുത്തല്.
Discussion about this post