കൊച്ചി: മുഖ്യമന്ത്രി പിണറായി വിജയനെതിരേ വിവാദ പരാമര്‍ശം നടത്തിയ കെപിസിസി അധ്യക്ഷന്‍ കെ. സുധാകരനെതിരെ പോലീസ് കേസെടുത്തു. സിപിഎം പ്രവര്‍ത്തകന്റെ പരാതിയില്‍ പാലാരിവട്ടം പോലീസാണ് എഫ്‌ഐആര്‍ രജിസ്റ്റര്‍ ചെയ്തത്. ഐപിസി 153 വകുപ്പ് പ്രകാരം വിദ്വേഷ പ്രസംഗം നടത്തിയതിനാണ് കേസ്.
കഴിഞ്ഞ ദിവസം തൃക്കാക്കര ഉപതെരഞ്ഞെടുപ്പ് പ്രചാരണത്തോടനുബന്ധിച്ച് നടത്തിയ പ്രസംഗത്തിനിടയിലാണ് സുധാകരന്‍ മുഖ്യമന്ത്രിക്കെതിരേ വിവാദ പരാമര്‍ശം നടത്തിയത്. എന്നാല്‍ പിന്നീട് സുധാകരന്‍ പ്രസ്താവന പിന്‍വലിക്കുകയും ചെയ്തിരുന്നു.
മലബാറിലെ സാധാരണ പ്രയോഗമാണ് താന്‍ ഉപയോഗിച്ചതെന്നും തന്നെ അറസ്റ്റ് ചെയ്യട്ടെയെന്നുമായിരുന്നു അദ്ദേഹം പ്രതികരിച്ചത്. സംസ്ഥാനത്ത് ഭരണം സ്തംഭിച്ച് നില്‍ക്കുകയാണ്. സര്‍ക്കാരിന്റെ കൈയില്‍ പണമില്ല. കെഎസ്ആര്‍ടിസി ശമ്പളം കൊടുത്തിട്ടില്ല. ജനങ്ങളോട് ബാധ്യത ഉള്ള മുഖ്യമന്ത്രി സര്‍ക്കാര്‍ പണം ചെലവഴിച്ചു തെരഞ്ഞെടുപ്പ് പ്രചാരണം നടത്തുന്നു. ഈ സാഹചര്യത്തില്‍ ഉപയോഗിച്ച പ്രയോഗമാണിതെന്നായിരുന്നു സുധാകരന്‍ വ്യക്തമാക്കിയത്. വിവാദ പരാമര്‍ശത്തിന്റെ ചുവടുപിടിച്ച് എല്‍ഡിഎഫ് നേതാക്കളും കെപിസിസി അധ്യക്ഷനെതിരേ രംഗത്തെത്തിയിരുന്നു. എല്‍ഡിഎഫ് കണ്‍വീനര്‍ ഇ.പി. ജയരാജനും മന്ത്രി പി. രാജീവും ഉള്‍പ്പെടെയുള്ളവര്‍ വിമര്‍ശനം ഉന്നയിച്ചു.
Discussion about this post