തിരുവനന്തപുരം: കേരളത്തില് കാലവര്ഷമെത്തിയെന്ന് കാലാവസ്ഥാ നിരീക്ഷണകേന്ദ്രം. ഇക്കുറി കാലവര്ഷം മൂന്ന് ദിവസം മുന്പാണ് സംസ്ഥാനത്തെത്തിയത്.
ഇന്നലെയോടെ അറബിക്കടലിന്റെ കിഴക്കന് ഭാഗത്തും ലക്ഷദ്വീപിലും കേരളത്തില് മിക്കയിടങ്ങളിലും തമിഴ്നാടിന്റെ തെക്കന് മേഖലയിലും മാന്നാര് കടലിടുക്കിലും ബംഗാള് ഉള്ക്കടലിന്റെ തെക്കുപടിഞ്ഞാറന് ഭാഗത്തും കേരളത്തിന്റെ തെക്കന് ജില്ലകളിലും കാലവര്ഷം വരവറിയിച്ചു.
അടുത്ത മൂന്നു-നാല് ദിവസങ്ങള്ക്കകം മധ്യ അറേബ്യന് കടലിലും കേരളത്തിലാകെയും കാലവര്ഷത്തിന്റെ ഭാഗമായ മഴ പെയ്തുതുടങ്ങുമെന്നും കാലാവസ്ഥാ നിരീക്ഷണകേന്ദ്രം അറിയിച്ചു.
പത്തു വര്ഷത്തിനിടെ ഇതു മൂന്നാം തവണയാണ് കാലവര്ഷം കേരളത്തില് നേരത്തേ പെയ്തു തുടങ്ങുന്നത്. സംസ്ഥാനത്താകെ ജാഗ്രതാ നിര്ദേശവും നല്കിയിട്ടുണ്ട്. വ്യാഴാഴ്ച വരെ കേരളത്തില് ഒറ്റപ്പെട്ട സ്ഥലങ്ങളില് കനത്ത മഴയ്ക്കു സാധ്യതയുണ്ടെന്നു കാലാവസ്ഥാ പ്രവചനത്തിന്റെ അടിസ്ഥാനത്തിലാണ് മുന്നറിയിപ്പ്. 14 ജില്ലകളില് യെല്ലോ അലര്ട്ട് പ്രഖ്യാപിച്ചു. മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ഒഴികെയുള്ള ഒന്പത് ജില്ലകളിലും ഇന്ന് യെല്ലോ അലര്ട്ട് പ്രഖ്യാപിച്ചു.
തിരുവനന്തപുരം, കൊല്ലം, വയനാട് ഒഴികെയുള്ള ജില്ലകളില് നാളെയും തിരുവനന്തപുരം, കൊല്ലം, പത്തനംതിട്ട, കോട്ടയം ഒഴികെയുള്ള ജില്ലകളില് ബുധനാഴ്ചയും യെല്ലോ അലര്ട്ട് പ്രഖ്യാപിച്ചു. തിരുവനന്തപുരം, കൊല്ലം, പാലക്കാട്, കോഴിക്കോട്, കാസര്ഗോഡ് ഒഴികെയുള്ള ജില്ലകളില് വ്യാഴാഴ്ചയും യെല്ലോ അലര്ട്ട് പ്രഖ്യാപിച്ചിട്ടുണ്ട്.
Discussion about this post