ന്യൂഡല്‍ഹി: അഗ്‌നിപഥ് പദ്ധതി നടപ്പാക്കാന്‍ തീരുമാനിച്ച് മുന്നോട്ടുപോകുകയാണ് കേന്ദ്ര സര്‍ക്കാര്‍. ഇതിനെതിരെ ഉത്തരേന്ത്യയില്‍ പ്രതിഷേധമാണ് നടക്കുന്നത്. നിലവില്‍ പദ്ധതി പ്രകാരം ‘അഗ്‌നിവീര്‍’ ആയി തിരഞ്ഞെടുക്കുന്നവരില്‍ 25 ശതമാനം പേര്‍ക്ക് ക്ഷമതയനുസരിച്ച് പ്രതിരോധ മേഖലയില്‍ സേവനം തുടരാനുളള കേന്ദ്ര പ്രഖ്യാപനം അവരെ ആശ്വസിപ്പിക്കുന്നില്ല. തുടര്‍ന്ന് ഉയര്‍ന്ന പ്രായം 23 വയസായി കേന്ദ്ര സര്‍ക്കാര്‍ പ്രഖ്യാപിച്ചിരുന്നു. നാല് വര്‍ഷം കരാര്‍ തൊഴിലിനെ എതിര്‍ക്കുന്ന ഉദ്യോഗാര്‍ത്ഥികള്‍ സ്ഥിരമായ തൊഴില്‍മാര്‍ഗമാണ് ആവശ്യപ്പെടുന്നത്.
കേന്ദ്ര തീരുമാനത്തില്‍ പ്രധാനമന്ത്രിയോട് നന്ദി പറഞ്ഞും അഗ്‌നിപഥ് വഴി തൊഴില്‍നേടാന്‍ യുവാക്കളെ പ്രേരിപ്പിച്ചും കേന്ദ്രമന്ത്രിമാര്‍ തന്നെ രംഗത്തെത്തിയിട്ടുണ്ട്. പ്രതിരോധ മന്ത്രി രാജ്നാഥ് സിംഗ്, ആഭ്യന്തരമന്ത്രി അമിത് ഷാ, ധനമന്ത്രി നിര്‍മ്മലാ സീതാരാമന്‍ എന്നിവരാണ് പ്രധാനമന്ത്രിയ്ക്ക് നന്ദി പറഞ്ഞ് ട്വീറ്റ് ചെയ്തത്.
‘രാജ്യത്തെ വലിയൊരു വിഭാഗം യുവാക്കള്‍ക്ക് ഈ തീരുമാനം പ്രയോജനപ്പെടും. അഗ്‌നിപഥ് പദ്ധതിയിലൂടെ അവര്‍ രാജ്യത്തിനും അവരുടെതന്നെയും ശോഭനമായ ഭാവിയ്ക്ക് വേണ്ടി മുന്നേറും.’ അമിത് ഷാ ട്വീറ്റ് ചെയ്തു. പ്രതിരോധ സംവിധാനത്തിന്റെ ഭാഗമാകാനും രാജ്യസേവനത്തിനുമുളള സുവര്‍ണാവസരമാണ് അഗ്‌നിപഥ് പദ്ധതിയെന്നും ഇതിന്റെ ഭാഗമാകണമെന്നുമാണ് പ്രതിരോധമന്ത്രി രാജ്നാഥ് സിംഗ് ട്വീറ്റ് ചെയ്തത്. രാജ്യസേവനത്തിന് അവസരം നഷ്ടപ്പെട്ടവര്‍ക്ക് മികച്ച അവസരമാണിതെന്ന് ധനമന്ത്രി നിര്‍മ്മലാ സീതാരാമനും പറഞ്ഞു.അതേസമയം കോണ്‍ഗ്രസ് നേതാക്കള്‍ പദ്ധതിയില്‍ എതിര്‍പ്പ് അറിയിച്ചിരിക്കുകയാണ്.
