തിരുവനന്തപുരം: സംസ്ഥാനത്ത് മങ്കിപോക്സ് സ്ഥിരീകരിച്ച സാഹചര്യത്തില് എല്ലാ ജില്ലകള്ക്കും ജാഗ്രതാ നിര്ദ്ദേശം നല്കിയതായി ആരോഗ്യമന്ത്രി വീണാ ജോര്ജ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം എന്നീ അഞ്ച് ജില്ലകളില് നിന്നുള്ളവര് ഫ്ളൈറ്റ് കോണ്ടാക്ട് ഉള്ളതിനാല് ആ ജില്ലകള്ക്ക് പ്രത്യേക ജാഗ്രത നല്കിയിട്ടുണ്ട്. രാവിലേയും വൈകുന്നേരവും ആരോഗ്യ പ്രവര്ത്തകര് ഇവരെ വിളിച്ച് വിവരങ്ങള് അന്വേഷിക്കുന്നുണ്ട്. ഇവര്ക്ക് പനിയോ മറ്റെന്തെങ്കിലും രോഗലക്ഷണങ്ങളോ ഉണ്ടെങ്കില് കൊവിഡ് ഉള്പ്പടെയുള്ള പരിശോധന നടത്തും. മങ്കിപോക്സിന്റെ ലക്ഷണങ്ങളുണ്ടെങ്കില് ആ പരിശോധനയും നടത്തും. എല്ലാ ജില്ലകളിലും ഐസൊലേഷന് സജ്ജമാക്കും. മെഡിക്കല് കോളേജുകളിലും പ്രത്യേക സൗകര്യമൊരുക്കും. ആരോഗ്യ വകുപ്പ് പ്രതിരോധ പ്രവര്ത്തനങ്ങള് ശക്തമാക്കിയിട്ടുണ്ട്. ആശങ്കപ്പെടേണ്ട സാഹചര്യമില്ലെന്നും മന്ത്രി പറഞ്ഞു.
മങ്കിപോക്സ് സ്ഥിരീകരിച്ച രാജ്യങ്ങളില് നിന്നും യാത്രക്കാര് ഉള്ളതിനാല് എയര്പോര്ട്ടുകളില് ജാഗ്രത പാലിക്കണം. അനാവശ്യമായ ഭീതിയോ ആശങ്കയോ വേണ്ട. രോഗി യാത്ര ചെയ്ത വിമാനത്തില് വന്നവര് സ്വയം നിരീക്ഷിക്കേണ്ടതാണ്. സംസ്ഥാന തലത്തില് മോണിറ്ററിംഗ് സെല് രൂപീകരിക്കും. എല്ലാ ജില്ലകള്ക്കും ഗൈഡ്ലൈന് നല്കും.
കഴിഞ്ഞ പന്ത്രണ്ടാം തീയതി യുഎഇ സമയം വൈകുന്നേരം അഞ്ച്മണിക്കുള്ള ഷാര്ജ തിരുവനന്തപുരം ഇന്ഡിഗോ വിമാനത്തിലാണ് രോഗം സ്ഥിരീകരിച്ചയാള് എത്തിയത്. വിമാനത്തില് 164 യാത്രക്കാരും ആറ് ക്യാബിന് ക്രൂവുമാണ് ഉണ്ടായിരുന്നത്. അതില് ഇദ്ദേഹത്തിന്റെ തൊട്ടടുത്ത സീറ്റുകളിലിരുന്ന 11 പേര് ഹൈ റിസ്ക് കോണ്ടാക്ട് പട്ടികയിലുള്ളവരാണ്. ഈ വിമാനത്തില് യാത്ര ചെയ്തവര് സ്വയം നിരീക്ഷണം നടത്തുകയും 21 ദിവസത്തിനകം എന്തെങ്കിലും രോഗലക്ഷണമുണ്ടെങ്കില് ആരോഗ്യ പ്രവര്ത്തകരെ വിവരം അറിയിക്കുകയും വേണമെന്ന് മന്ത്രി അറിയിച്ചു.
കുടുംബാംഗങ്ങളില് അച്ഛനും അമ്മയും, ഓട്ടോ ഡ്രൈവര്, ടാക്സി ഡ്രൈവര്, സ്വകാര്യ ആശുപത്രിയിലെ ഡെര്മറ്റോളജിസ്റ്റ്, തൊട്ടടുത്ത സീറ്റുകളിലിരുന്ന 11 യാത്രക്കാര് എന്നിവരാണ് ഇപ്പോള് പ്രാഥമിക സമ്പര്ക്ക പട്ടികയിലുള്ളത്. എമിഗ്രേഷന് ക്ലിയറന്സ് ഉദ്യോഗസ്ഥരേയും രോഗിയുടെ ബഗേജ് കൈകാര്യം ചെയ്തവരേയും നിരീക്ഷിക്കും. രോഗം സ്ഥിരീകരിച്ചയാളുടെ ആരോഗ്യനില തൃപ്തികരമാണെന്നും ആരോഗ്യമന്ത്രി അറിയിച്ചു.
എല്ലാ ജില്ലകള്ക്കും ജാഗ്രത നിര്ദേശം നല്കിയിട്ടുണ്ട്. ആരോഗ്യ പ്രവര്ത്തകര്ക്ക് വിദഗ്ദ്ധ പരിശീലനം ലഭ്യമാക്കും. രോഗിയുമായി മുഖാമുഖം വരിക, രോഗി ധരിച്ച വസ്ത്രങ്ങള്, പാത്രങ്ങള്, കിടക്ക എന്നിവ ഉപയോഗിക്കുക, പിപിഇ കിറ്റ് ഇടാതെ സമീപിക്കുക, രോഗം വന്നയാളുമായി ലൈംഗിക ബന്ധം പുലര്ത്തുക എന്നിവ ക്ലോസ് കോണ്ടാക്ട് ആയി വരുമെന്നും മന്ത്രി അറിയിച്ചു.
Discussion about this post